Qyzylordada múgedek kásipkerlerdiń alǵashqy forýmy ótti
QYZYLORDA. QazAqparat- Qyzylordada múgedektigi bar kásipkerlerdiń alǵashqy forýmy ótti, dep habarlady QazAqparat tilshisi.
Forýmnyń ashylý saltanatynda Qyzylorda oblysynyń ákimi Qyrymbek Kósherbaev jáne «Damý» qorynyń basqarma tóraǵasy Abaı Sarqulov sóz sóıledi.
Іs-shara barysynda óńir basshysy memlekettik baǵdarlamalar men «Damý» qorynyń jobalaryna qatysyp, óz jobalaryn sátti júzege asyra bilgen erekshe múmkindiktegi kásipkerlerge alǵys hattar tabystady. Sondaı-aq, «Damý-Kómek» jobasy boıynsha demeýshilik kómek te tabystaldy. Sondaı-aq tabysqa qol jetkizgen kásipkerlerge qyzmet kórsetý men taýar satyp alýǵa tegin sertıfıkattar berildi.
Forým aıasynda múgedektigi bar kásipkerlerdiń qolynan shyqqan túrli taýar men ónimder jáne qyzmet túrlerine arnalǵan kórme uıymdastyryldy. 20-dan asa kompanııa kórmede kádesyılardan qurylys zattaryna deıingi alýan túrli ónimderin usyndy. Olardyń ishinde - aımaqta básekelesi joq, bolat arqan men ilmekter shyǵaratyn jalǵyz kásipker Ernys Túlendıev te boldy. Ol nesıe rásimdeý barysynda kepilmúlki jetispeýshiligi máselesin Qordyń kepildendirýimen oń sheshýi arqasynda kásiporynnyń óndiris kólemin edáýir arttyrǵan edi.
«Forýmnyń basty maqsaty - múmkindigi shekteýli kásipkerler arasynda tabysty kásipkerlikti dáripteý jáne onyń damýyna kolaıly jaǵdaı jasaý. Búgingi is-sharaǵa qatysýshylar - taǵdyrdyń taýqymetine moıymaı, qoǵamda óz ornyn taba bilgen jáne ózin jumyspen qamtýmen shektelip qana qoımaı, ózgeni de turaqty qyzmetke alyp, kásipterin dóńgeletip otyrǵan azamattar. Múmkindigi shekteýli azamattardy jumysqa ornalastyrý qashanda ózekti másele ekeni ras, al munyń balamasy kásipkerlik bolyp tabylady. Sondyqtan bizder memlekettik organdar, qarjy uıymdary men tabysty kásipkerlerdiń basyn biriktire otyryp, múmkindigi shekteýli kásipkerlerge ataýly kómek kórsetýge talpyndyrýdy uıymdastyra bilýimiz qajet. Búgingi forým múgedektigi bar azamattar men tabysty kásipkerler arasynda tájirıbe almasý maqsatyndaǵy mańyzdy, ári tıimdi dıalog alańy retinde qalystasty dep úmittenemin», - dedi «Damý» qorynyń basqarma tóraǵasy Abaı Sarqulov.
Forým barysynda bı nómirimen «Qyzylorda eriktileri» qorynyń músheleri «Erekshe bı» jobasymen qatysýshylardy tamsandyrdy. Bıshiler quramynyń teń jartysy óz ónerlerin múgedektik arbada otyryp oryndady.
Forýmnyń ekinshi bóliminde aqparattyq-túsindirme semınary, dóńgelek ústel men múmkindigi shekteýli tabysty kásipker Baqyt Jumashevtyń sheberlik saǵaty ótti.
