Qyzylordada monıtorıng toby 2 úılený toıyn toqtatty

QYZYLORDA. QazAqparat - Qyzylordada karantın talaby saqtalýyn qadaǵalaıtyn monıtorıng top músheleri úılený toıyn jasaǵan 2 turǵynǵa ákimshilik hattama toltyrdy, dep habarlaıdy QazAqparat tilshisi.

Monıtorıng top músheleri jyl basynan beri 58 reıd júrgizdi. Nátıjesinde 2 536 nysan qamtylyp, onda 163 karantın talabyn buzý deregi anyqtaldy. Onyń ishinde 83-i halyqqa qyzmet kórsetý nysandarynda tirkelse, 45-i úıde ótkizilgen kópshilik is-sharalar sanalady. Sondaı-aq, bilim berý nysandarynda - 30, medıtsınalyq mekemelerde - 3 karantın talabyn buzý tirkelgen.

«Monıtorıng top músheleri Jalaǵash aýdanynyń ortalyǵynda 2 úılený toıyn toqtatty. Al Jańaqorǵan aýdanynda 3 otbasylyq shara uıymdastyrylǵan. Anyqtalǵan derekter negizinde búgingi kúnge deıin QR Ákimshilik quqyq buzýshylyq týraly kodeksiniń 425-baby 1-bóligimen jalpy somasy 13 753 655 teńgege aıyppul salyndy. Bul boıynsha zańdy tulǵalar men jeke kásipkerge qatysty - 16, laýazymdyq tulǵaǵa - 5, nysandarǵa qatysy bar jeke tulǵalarǵa -98 hattama toltyrylǵan. Qalǵany nysandarmen baılanysty emes jeke tulǵalarǵa qatysty bolyp otyr», - dep málim etti Qyzylorda oblysy ákimdiginiń baspasóz qyzmetinen.

Eske salsaq, Qyzylordada Syrdarııa aýdany «qyzyl» aımaqqa engizildi.