Qyzylordada Microsoft akademııasy ashylady
ASTANA. QazAqparat - Qorqyt Ata atyndaǵy Qyzylorda memlekettik ýnıversıteti bazasynda "Maıkrosoft akademııasy" men ınnovatsııalyq ınjınırıng ortalyǵy ashylady, dep habarlaıdy QazAqparat tilshisi.
Bul týraly QR Úkimetinde ótken baspasóz máslıhatynda Qyzylorda oblysynyń ákimi Qyrymbek Kósherbaev málimdedi.
«Sáýir aıynda Microsoft kompanııasymen yntymaqtastyq týraly memorandým bekittik jáne shilde aıynan bastap, onlaın-oqytý arqyly zamanaýı ınjenerlik-kompıýterlik tehnologııalardy qoldanatyn biliktiligi joǵary mamandardy daıyndaýdy bastadyq. Birlesken ǵylymı-zertteý jáne tájirıbelik-eksperımenttik jumystardy júrgizý úshin Qorqyt Ata atyndaǵy Qyzylorda memlekettik ýnıversıteti bazasynda "Maıkrosoft akademııasyn" qurý týraly ýaǵdalastyq", - dedi óńir basshysy.
Ákimniń aıtýynsha, qazirgi ýaqytta oblysta Machine-Learning tehnologııasy arqyly kúrish alqabynyń shyǵymyn boljap, sý tasqyny jaǵdaılaryn modeldeý baǵyttary qolǵa alyndy. Machine-Learning - álemde keńinen qoldanylatyn Microsoft kompanııasynyń ónimi.
"Odan bólek, EKSPO aýmaǵyn qoldana otyryp, Máskeý bolat jáne qorytpalar ınstıtýtymen Qyzylordada mashına qurastyrý, 3-D prınteriniń kómegimen túıinder men detaldar óndirýge baǵyttalǵan máskeýlik ǵylymı-zertteý ınjınırıng ortalyǵynyń balamasyn qurý jóninde kelissózder júrgizdik», - dep tolyqtyrdy Q. Kósherbaev.
Aıta keteıik, búgin Qazaqstan Respýblıkasy Úkimetinde Elbasy Joldaýynan týyndaǵan mindetterdiń Qyzylorda óńirinde oryndalý barysyna arnalǵan baspasóz máslıhaty ótti. Basqosýda oblys ákimi Qyrymbek Kósherbaev aımaqtyń áleýmettik-ekonomıkalyq damýy men aldaǵy josparlary týraly baıandady.
