Qyzylordada «Mereıli otbasy» baıqaýynyń jeńimpazdary marapattaldy
QYZYLORDA. QazAqparat - Qyzylorda oblysynda «Mereıli otbasy» baıqaýynyń jeńimpazdaryn marapattaý rásimi ótti. Bul baıqaý Memleket basshysynyń bastamasymen elimizde 2014 jyldan bastap ótkizilip keledi, - dep habarlady QazAqparat.
Saıys qorytyndysynda Shıeli aýdanynda turatyn Islamhanovtar áýleti baıqaýdyń jeńimpazy atandy. Otaǵasy Áribjan Islamhanov tyl ardageri jáne eńbek eri, jary - Nazym Qalmenova "Batyr ana", "Altyn alqa" ıegeri. Shańyraq qurǵandaryna 59 jyl bolǵan otbasy búginde 10 baladan 40 nemere, 16 shóbere súıip otyr.
Al, birinshi oryndy Jalaǵash aýdanynan Ǵanıevter otbasy ıelense, ekinshi oryn araldyq Aımyrzaevtar otbasyna buıyrdy. Júldeli úshinshi oryndy syrdarııalyq Sultanovtar otbasy men jalaǵashtyq Nurmaǵanbetovter otbasy qanjyǵalaryna baılady. Sonymen qatar, Jańaqorǵan aýdanynan Arynovtar otbasy «Ulaǵatty otbasy» nomınatsııasymen, qarmaqshylyq Shymbaevtar otbasy «Ónerli otbasy» nomınatsııasymen, Qyzylorda qalasynan Balmahanovtar otbasy «Qamqorlyq» nomınatsııasymen, syrdarııalyq Mıastsovtar áýleti «Otbasylyq úılesim» nomınatsııasymen marapattaldy.
Oblys ákimi Qyrymbek Kósherbaev baıqaýdyń barlyq qatysýshylaryn quttyqtady.
- Memleket basshysy Nursultan Ábishuly Nazarbaevtyń bastamasymen qolǵa alynyp, búginde ulttyq mártebege ıe bolǵan «Mereıli otbasy» baıqaýy otbasy qundylyqtary men qazaq úshin qashan da kıeli sanalatyn bir shańyraq astynda berekeli ómir súrýdiń mańyzdylyǵyn nasıhattaýda orny erekshe, taǵylymdy sharanyń birine aınalyp otyr. Aımaǵymyzda tórtinshi ret ótkizilip otyrǵan bul mereıli sharaǵa qatysýǵa nıet bildirýshiler jyldan-jylǵa artyp kele jatqany qýantady. Bıyl baıqaýǵa oblysymyzdyń barlyq óńirinen 337 otbasy qatysty. Bul otbasylardyń barlyǵy da keremet, naǵyz jeńimpaz otbasylar, - dedi aımaq basshysy.
Baıqaý jeńimpazdary dıplomdarmen jáne baǵaly syılyqtarmen marapattaldy.
