Qyzylordada merdigerdiń kemshiliginen mektep qurylysy aıaqtalmaı otyr
QYZYLORDA. QazAqparat - Qyzylorda oblysy Jańaqorǵan aýdany Aqqum aýylyndaǵy jańa oqý jylyna deıin paıdalanýǵa beriledi dep josparlanǵan 100 oryndyq mektep bilim kúninde esigin aıqara ashqan joq. Bilim ǵımaraty qurylysynyń keshigýine merdiger mekeme tarapynan jiberilgen kemshilikter sebep bolyp otyr, dep habarlaıdy QazAqparat tilshisi.
Qyzylorda oblysy qurylys, sáýlet jáne qala qurylysy basqarmasynyń basshysy Muhamedısa Álserikov «Merdigerlerdiń jaýapsyzdyǵy Qyzylorda oblysy, Jańaqorǵan aýdany, Aqqum aýylyndaǵy 100 oryndyq mektepti paıdalanýǵa beriletin merziminen keshiktirdi» dedi. Mektep qurylysynyń bas merdigeri «Nurym» QK» JShS nysandy ústimizdegi jyldyń shilde aıynda tapsyrýy kerek-tin. Degenmen, qurylys kesteden qalys qalyp, oqý jylynyń basynda mektep daıyn emes.
«Qurylys jumystary keste boıynsha byltyr bastaldy. Jumystyń bastapqy kezeńi ýaqytyly jasaldy, biraq 2018 jyly jumys qarqyny báseńdedi»,-deıdi basqarma basshysy Muhamedısa Álserikov.
Basqarma basshysynyń aıtýynsha, qazirgi tańda jumys kóleminiń 85%-y oryndaldy, biraq abattandyrý, kógaldandyrý jáne tehnologııalyq jabdyqtardy ornatý jumystary aıaqtalmaı otyr.
«Qoımaǵa zattar jetkizilgenimen, merdigerler jabdyqtardyń ornatylmaýyna baılanysty árleý jumystaryn ýaqytynda bitirip úlgermedi. Kesteden kesh qalýyna qatysty birneshe ret eskertilip, merdigerge 3 hat, tehnıkalyq qadaǵalaý ınjenerine bir ret hat joldandy. Qazirgi tańda, memlekettik satyp alýshynyń jaýapsyz áreketi úshin sotqa berip, sonymen qatar aıyppul tóletip, qurylysty aıaqtaýdy mindetteýge qatysty sot isi bastaldy»,- deıdi M.Álserikov.
Onyń aıtýynsha, qurylys jáne qabyldaý jumystary aǵymdaǵy jyldyń tórtinshi toqsanynda aıaqtalady.
Oblystyq bilim basqarmasy bastyǵynyń orynbasary Quralaı Ertashovanyń aıtýynsha, qurylys aıaqtalǵanǵa deıin sabaq oqý protsesine jaramdy eski mektep ǵımaratynda ótkiziledi.
