Qyzylordada memlekettik qyzmetke úmitkerlerdiń bilimi tómen

QYZYLORDA. QazAqparat - Bıylǵy jyldyń birinshi jartyjyldyǵynda Qyzylorda oblysy boıynsha memlekettik qyzmetke irikteýdiń alǵashqy deńgeıine 1414 adam qatysyp, onyń 515-i shekti mánnen tómen emes nátıjege ıe bolǵan, dep habarlaıdy QazAqparat  tilshisi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamentine silteme jasap.

Atap aıtqanda, memlekettik ákimshilik qyzmetke úmitkerlerdiń 36,4 paıyzy nemese úshten biri ǵana bilim deńgeıiniń talapqa saı ekendigin dáleldeı alǵan. Sonymen qatar, quqyq qorǵaý organdaryna alǵash kiretin azamattardy testileýge 1021 adam qatysyp, olardyń 494 nemese 48,4 paıyzy shekti mánnen tómen emes nátıjeni ıelengen.

«Qazirgi tańda, memlekettik qyzmetke azamattardy irikteýdiń úsh deńgeıi qarastyrylǵan. Onyń alǵashqy deńgeıinde  úmitkerdiń zańnamalyq biliktiligi test arqyly anyqtalsa, ekinshisinde  iskerlik qasıeti baǵalanady. Sońǵysy  kásibı biliktiligine qatysty áńgimelesýden ótý bolyp belgilengen. Memlekettik qyzmetke úmitkerlerdiń testke óz daıyndyq deńgeılerin tekserý maqsatynda ústimizdegi jyldyń mamyr aıynan bastap "Personaldy basqarý ortalyǵy" AQ arqyly synama testileý bastaldy. Synama testileýge qatysý úshin aldyn ala "Personaldy basqarý ortalyǵy" aktsıonerlik qoǵamynyń aımaqtaǵy mamanyna habarlasyp, synama testileýdiń sharttaryn bilýge bolady», - dedi Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamentiniń basshysy Abzal Muhımov.

Jyl basynan beri oblystyń memlekettik organdaryndaǵy bos laýazymdarǵa ornalasýǵa ótkizilgen 693 konkýrsqa 965 adam qatysyp, orta eseppen bir laýazymǵa 1,4 adamnan kelgen.