Qyzylordada mektepti baqylaýsyz qaldyrǵan polıtseı jumystan ketti

QYZYLORDA. QazAqparat-Qyzylorda oblystyq prokýratýrasy «Balalardy birge qorǵaımyz» jobasyn júzege asyrý aıasynda jergilikti polıtsııa qyzmetiniń tıimdiligine taldaý júrgizdi. 

Tekserý kezinde Shıeli kentindegi №127 mektepke bekitilgen polıtsııa ınspektory birneshe kún boıy bilim ordasynda bolmaǵany anyqtaldy. Ol týraly aýdandyq ІІB jergilikti polıtsııa qyzmetiniń basshylyǵy da habarsyz ekendigi anyqtaldy, dep habarlady QazAqparat HAA tilshisi.

Osyǵan baılanysty oblystyq prokýratýra Qyzylorda oblystyq ІІD jergilikti polıtsııa qyzmetine usynym engizdi. Nátıjesinde mekteptiń polıtsııa ınspektory «qyzmet tártibin óreskel buzǵany úshin» jumystan bosatyldy.

Qazirgi kúni qaramaǵyndaǵy qyzmetkerlerge vedomstvolyq baqylaý júrgizbegeni úshin aýdandyq ІІB basshylarynyń máselesi qaralýda.