Qyzylordada mektep salýda memleketke 25 mln teńge zalal keltirgender anyqtaldy

QYZYLORDA. QazAqparat - Qyzylorda oblystyq prokýratýrasy tapsyrys berýshi men merdiger mektepti salý barysynda memleketke 25 mln teńge zalal keltirgenin anyqtady, dep habarlaıdy QazAqparat tilshisi.

Qyzylorda oblysynyń prokýratýrasy áleýmettik jelige monıtorıng júrgizý barysynda oblys ortalyǵyndaǵy 600 oryndyq mektepti salý barysynda zań buzýshylyq jónindegi jarııalanymdy nazarǵa alǵan edi. Bilim berý orny Jappasbaı batyr kóshesinde ornalasqan. Quny - 1 mlrd teńge.

«Zerdeleý barysynda 2018 jyly tapsyrys berýshi Qyzylorda oblysynyń qurylys, sáýlet jáne qala qurylysy basqarmasy men merdiger «Arııa-Jańa Astana» JShS arasynda memlekettik satyp alý týraly sharty jasalǵany anyqtaldy. Oblystyq prokýratýra tapsyrmasy negizinde atalǵan nysanda Qyzylorda oblysy boıynsha Іshki memlekettik aýdıt departamenti mamandary tekseris júrgizdi. Tekseris qorytyndysy boıynsha onda 25 mln teńgeniń jumysy atqarylmaı, memleketke zalal kelgeni anyqtaldy», - dep málim etti oblystyq prokýratýradan.

Vedomstvo málimetinshe, atalǵan derek boıynsha oblys prokýratýrasy tapsyrys berýshi men merdigerge qatysty Qylmystyq kodekstiń 189-baby 4-bóligimen sotqa deıingi tergep-tekserý tirkeldi. Ony júrgizý Qyzylorda oblysy boıynsha sybaılas jemqorlyqqa qarsy is-qımyl departamentine júkteldi.

Eske salsaq, budan buryn Qyzylordada sabaq kestesin durys uıymdastyrmaǵan mektepterge aıyppul salyndy.