Qyzylordada mektep-gımnazııa ǵasyrlyq mereıtoıyn atap ótti
QYZYLORDA. QazAqparat - Qyzylorda qalasyndaǵy Qaltaı Muhamedjanov atyndaǵy №1 mektep-gımnazııasy ashylǵanyna 100 tolý mereıtoıyn atap ótti, dep habarlaıdy QazAqparat tilshisi.
Ǵasyrlyq shejiresi tasqa basylǵan bilim ordasynyń mereıtoıyna oraı «Zamanaýı bilim tendentsııalary jáne Qaltaı Muhamedjanov murasy» atty ǵylymı-tanymdyq konferentsııa ótkizildi. Oǵan oblystyq bilim basqarmasynyń basshysy Maıra Meldebekova, aqyn, Alash syılyǵynyń ıegeri Seıfolla Ospanov, saıası ǵylymdar kandıdaty, professor Ábdijálel Bákir jáne ózge de elge tagymal azamattar qatysty.
Jurtshylyq aldynda oblystyq bilim basqarmasynyń basshysy Maıra Meldebekova sóz alyp júrekjardy lebizin bildirdi. Ulaǵat ordasynda uzaq jyldan beri tálim berip júrgen ustazdarǵa Bilim jáne ǵylym mınıstrliginiń Qurmet gramotasyn tabys etti. Sondaı-aq, birqatar ustazdar oblys ákiminiń Alǵys hatymen marapattaldy.
Mektep-gımnazııa tarıhy 1918 jyldyń 1 qazanynan bastaý alady. Bul shańyraqta talaı jaqsy men jaısańdar shákirtterge bilim nárin berdi. Osyndaı ulaǵatty ustazdardan tálim alǵan túlekter de árdaıym ózderiniń altyn uıasyn maqtan tutady.
Osydan ǵasyr buryn, 1918 jylǵy qazan aıynyń besinde Aqmeshit qalasynda musylman uldar mektebi muǵalimderiniń alǵashqy otyrysy boldy. Onyń hattamasynda Sh.Vallıýllın, A.Ibragımov, M.Ǵazızov jáne N.Bekbolatovtar qatysqany, olar óz ortalarynan mekteptiń meńgerýshisi etip Sh.Vallıýllındi saılaǵany jazylǵan. Mine, osy kún Syr boıyndaǵy qazaq oqý oryndarynyń alǵashqy qara shańyraǵy, burynǵy 1 Maı, qazirgi Qaltaı Muhamedjanov atyndaǵy №1 mektep-gımnazııasynyń irgetasynyń qalanǵan kúni bolyp, atalyp keledi.
«Mereıtoı aıasynda «Taǵylymdy tarıh mektebi» taqyryby boıynsha arnaıy joba jasaldy. Sonyń aıasynda týǵan ólkeniń tarıhyn, qundy derekterin taný arqyly jas urpaqtyń boıynda patrıottyq sezim qalyptastyrý baǵytynda arnaıy is-sharalar uıymdastyryldy. Atqarylǵan is-sharalar ujymnyń, órenderdiń mektep jáne týǵan jer tarıhyn tanyp, ótken ómiri men búgingisin baǵamdaýyna jol ashady», - dedi mektep dırektory Danabek Ábdiraıymov.
Saltanatty shara barysynda aqyn Seıfolla Ospan, saıası ǵylymdar kandıdaty, professor Ábdijálel Bákir, mekteptiń 1998-2007 jyldardaǵy dırektory Kúlásh Ejetaeva, mektep túlegi, medıtsına salasynyń eńbegi sińgen ardageri Turǵanbaı Mahanov óz lebizderin bildirdi.
