Qyzylordada mektep ashanalaryn tekserýde birqatar kemshilik anyqtaldy
Qyzylorda oblysynyń Taýarlar men kórsetiletin qyzmetterdiń sapasy men qaýipsizdigin baqylaý departamentiniń baqylaýynda 296 mektep bar. Jańa 2019-2020 oqý jylynda turmysy tómen otbasynan shyqqan 26 880 oqýshy jalpy mindetti oqý qory esebinen tolyqtaı tegin ystyq tamaqpen qamtamasyz etilgen. Mektepterde beriletin as máziri, taǵamnyń qunarlyǵy men portsııasy, tamaqtaný ratsıony balanyń fızıologııalyq jáne jas ereksheligi normasyn eskere otyryp ázirlenedi.
Mektepterde ystyq tamaqpen qamtamasyz etý máselesi sanıtarlyq qaǵıdalarda belgilengen. Oblys mektepterinde osy sanıtaryq qaǵıdalardyń saqtalýy, oqýshylardy mektepte tamaqtandyrý máselesi atalmysh departamenttiń baqylaýynda.
Vedomstvoynyń habarlaýynsha, 2019 jyly jeke kásipkerlerge jalǵa berilgen 278 mektep ashanasynyń 239-na erekshe tártip boıynsha tekserý júrgizildi. Tekserýde kásipkerdiń sanıtarlyq qaǵıda talaptaryn buzǵany anyqtaldy.
Atap aıtqanda, sanıtarııalyq-epıdemıologııalyq qorytyndynyń bolmaýy, ashanalarda sý, káriz, jasandy jeldetkish júıeleriniń isten shyǵýy, taǵam óniminiń qaýipsizdigin rastaıtyn qujatyń bolmaýy anyqtaldy.
«Tekserý barysynda bakterıologııalyq zerthanaǵa alynǵan 4 613 shaıyndynyń 450 synamasynan (10%) ishek taıaqshasy tobynyń bakterııalary tabylǵan. Sonymen qatar, 559 taǵam úlgisiniń 63-nen jáne 463 aýyz sý úlgisiniń 59-nan mıkrobıologııalyq kórsetkishter boıynsha sáıkessizdik anyqtalǵan. As qunarlyǵyn anyqtaý úshin sanıtarlyq-hımııalyq zerthanaǵa 674 taǵam úlgisi alynyp, onyń 104-i belgilengen sanıtarlyq-gıgıenalyq normalarǵa sáıkes bolmaı shyqty. Zalalsyzdandyrý eritindileri boıynsha 540 synamanyń 109-nda sapaly dezınfektsııa jasaý úshin eritindi kontsentratsııasynyń qalypty normadan aýytqýshylyǵy anyqtalǵan», - dedi oblystyq Taýarlar men kórsetiletin qyzmetterdiń sapasy men qaýipsizdigin baqylaý departamentiniń bólim basshysy Almash Shýaqbaeva.
