Qyzylordada medıtsına mamandaryna 152 mln teńge ústemeaqy berildi
QYZYLORDA. QazAqparat - Qyzylorda oblysynda byltyr koronavırýspen kúres baǵytynda nátıjeli qyzmet atqarǵan 16 myńnan astam medıtsına qyzmetkerine 3 mlrd. teńge ústemaqy tólendi. Al bıyl qańtar aıynda mundaı kómekti densaýlyq salasynyń 1060 mamany aldy, dep habarlaıdy QazAqparat tilshisi.
Oblysta ústemaqy ótken jyldyń naýryz aıynan tólenip keledi.
Byltyrǵy qaterli indet kúrdelengen shilde aıynda óńirdegi densaýlyq saqtaý salasynyń 3458 mamanyna 1 mıllıard teńgege jýyq ústemaqy berildi.
«Mundaı jumystar bıyl da jalǵasyn tabýda. Qańtar aıynda 1060 medıtsına qyzmetkerine 152,7 mln. teńge ústemaqy tólendi. Olardyń basym bóligi - súzgi bólimsheleri men mobıldi top qyzmetkerleri», - deıdi oblystyq densaýlyq saqtaý basqarmasynyń basshysy Sábıt Pazılov.
COVID-19 juqtyrýdyń táýekel toptary úshke bólinedi.
Alǵashqysy óte joǵary topqa koronavırýsy bar patsıentterge medıtsınalyq kómek kórsetý úshin anyqtalǵan reanımatsııa bólimsheleri men ózge de statsıonarlardy qosa alǵanda, ınfektsııalyq statsıonarlardyń dárigerleri, orta jáne kishi medıtsına qyzmetkerleri jatady.
Bul mamandar 850 myń teńgeden ústemaqy aldy.
Kelesi joǵary topqa provızorlyq statsıonarlardyń dárigerleri, orta jáne kishi medıtsına qyzmetkerleri, jedel medıtsınalyq járdem, onyń ishinde ambýlatorııalyq-emhanalyq uıymdar janyndaǵy dárigerler men feldsherler engizilgen.
Sondaı-aq, bul toptaǵy sanıtarlyq avıatsııanyń dárigerleri men orta medıtsına qyzmetkerleri jatqyzylady.
Olarǵa 425 myń teńgeden ústemaqy berildi.
Úshinshisi ortasha toptaǵylarǵa 212,5 myń teńgeden aspaıtyn ústemaqy berildi.
Oǵan karantındik statsıonarlardyń dárigerleri, orta jáne kishi medıtsına qyzmetkerleri, jedel medıtsınalyq kómek brıgadalarynyń júrgizýshileri jatqyzylǵan.
Sondaı-aq, onda epıdemııaǵa qarsy is-sharalardy júrgizýge tikeleı qatysatyn zerthanalardyń mamandary, sanıtarııalyq-epıdemıologııalyq qyzmet qyzmetkerleri bar.
Bul topqa tótenshe jaǵdaı jónindegi jedel shtabtyń jáne oblystar, respýblıkalyq mańyzy bar qalalar men astana ákimdikteriniń aýmaqtyq shtabtarynyń músheleri, blokposta karantın rejımin qamtamasyz etetin densaýlyq saqtaý qyzmetkerleri de engizilgen.
Esterińizge sala ketelik, ótken aptada Qyzylorda oblysynda 70 adamnan koronavırýs anyqtaldy.
