Qyzylordada Medıtsına qyzmetkerleriniń kúni atalyp ótti
QYZYLORDA. 16 maýsym. QazAqparat - Keshe Qyzylordadaǵy N.Bekejanov atyndaǵy oblystyq mýzykalyq drama teatrynda Medıtsına qyzmetkerleri kúnine arnalǵan saltanatty jıyn bolyp ótti.
Aımaq aq halatty jandarynyń ataýly merekesine oblys ákimi Bolatbek Qýandyqov qatysyp, sala qyzmetkerleri men ardagerlerin jylyna bir aınalyp keletin mereıli kúnderimen quttyqtady. Aımaq basshysy atap ótkendeı, Elbasy Nursultan Nazarbaev qashannan qazaqstandyqtardyń densaýlyǵy máselesine aıryqsha kóńil bólip keledi. Memleket basshysynyń tikeleı bastama kóterýimen osydan birneshe jyl buryn «100 aýrýhana» memlekettik baǵdarlamasy paıda boldy. Sonyń arqasynda ortalyqtan shalǵaı jatqan kóptegen eldi mekenderde jurtqa asa qajetti medıtsınalyq mekemeler salyndy. Qazir memleket «2011-2015 jyldarǵa arnalǵan Salamatty Qazaqstan» baǵdarlamasynyń tabysty júzege asyrylýyn muqııat qadaǵalap otyr. Bizdiń elimizde joǵary kásibı deńgeıdegi medıtsınalyq kadrlardy daıarlaý isine de aıryqsha mán beriledi. Bul eń aldymen salany qarjylandyrý máselesiniń jaqsara bastaǵanynan kórinis tabady. Osynyń negizinde oblys sońǵy jyldary turǵyndar densaýlyǵyn jaqsartý baǵytynda jaqsy jetistikterge qol jetkizýde. Atap aıtqanda, jalpy aýrýshańdyq óńirde 11,7 paıyzǵa tómendese, onkologııalyq syrqat túrleriniń 1,3 paıyzǵa azaıǵany baıqalady. Sol sııaqty týberkýlezben aýyrýshylar qatary 8,8 paıyzǵa kemidi. Búginde «Dıplommen aýylǵa» baǵdarlamasy aıasynda aýyldyq jerlerge jas dáriger kadrlardy tartý jaqsy jolǵa qoıyla bastady.
Oblys ákimi jıyn sońynda bir top medıtsına qyzmetkerlerin ónegeli qyzmetteri úshin qurmet gramotalarymen marapattap, taǵy bir top dárigerge «Densaýlyq isiniń úzdigi» belgisin tapsyrdy.
Kesh sońy merekelik kontsertke ulasty.
