Qyzylordada medıtsına qyzmetkerleri kúni atalyp ótti
QYZYLORDA. QazAqparat-Búgin Qyzylorda qalasynda medıtsına qyzmetkerleriniń kúnine arnalǵan saltanatty shara ótti. Oblys ákimi Qyrymbek Kósherbaev densaýlyq saqtaý salasynyń mamandaryn kásibı merekelerimen quttyqtap, olardyń joǵary jetistikterin atap ótti, dep habarlady QazAqparat.
«Atqarylǵan jumystyń nátıjesi kórsetkishtermen baǵalanady. Óńirimizde ómir súrý uzaqtyǵy 71,9 jasqa jetti. Ana ólimi 86,6 paıyzǵa, sábı ólimi 2,5 esege tómendedi. Júrek-qan tamyrlary aýrýlarymen naýqastaný men saldarynan bolatyn ólim 6 paıyzǵa, qaterli isik aýrýlarymen naýqastaný jáne onyń saldarynan bolatyn ólim 8,4 paıyzǵa, týberkýlez 10,3 paıyzǵa azaıdy. Jasyratyny joq, osydan bir-eki jyl buryn respýblıkalyq kórsetkishterdiń aldyńǵy oryndaryn bermeı keldik. Qazir ana men sábı ólimi kórsetkishteri boıynsha respýblıkada 9 orynǵa turaqtadyq. Bul sandar medıtsına qyzmetkerleriniń eren eńbeginiń arqasynda qol jetkizilgen jetistikter», -dedi aımaq basshysy.
Saltanatty shara barysynda oblys ákimi Q.Kósherbaev medıtsına salasynyń eń úzdik qyzmetkerlerin marapattady.
