Qyzylordada máıithanada alaıaqtyq jasaǵan adam sottaldy

QYZYLORDA. QazAqparat - Qyzylordada máıithana qyzmetine júgingen azamattardy aldaǵan Taraz turǵyny sotty boldy. Ol marqum bolǵan jandardyń týystaryna máıitti eshqandaı soıdyrmaı alyp beretinin aıtyp, sol qyzmetine aldyn ala aqsha alǵannan keıin oqıǵa ornynan boı tasalap ketken, dep habarlaıdy QazAqparat tilshisi.

Taraz qalasynyń turǵyny ońaı jolmen aqsha tabý maqsatynda Qyzylordaǵa arnaıy kelgen. Qylmystyq pıǵylyn iske asyrý maqsatynda birneshe kúnge qonaq úı jaldaǵan. Keshkisin taksı jaldap qaladaǵy emhana, aýrýhana, medıtsınalyq ortalyq jáne máıithanaǵa barǵan.

Osylaısha qylmystyq oıyn júzege asyrýǵa qolaıly sátti kútken. Máıithana qyzmetine júgingenderge týystarynyń máıitin soıdyrmaı alyp beretinin aıtyp, sendirgen. Bul áreketi úshin ártúrli kólemde aqsha alyp otyrǵan. Sodan keıin oqıǵa ornynan izin sýytatyn bolǵan.

«Ol atalǵan qylmysy úshin QR Qylmystyq kodeksiniń 190-babynyń 3-bóliginiń 4-tarmaǵymen kináli dep tanyldy. Oǵan Qyzylorda qalalyq №2 sotynyń úkimimen 3 jyl merzimge bas bostandyǵynan aıyrý jazasy taǵaıyndaldy.

«Alaıaqtar azamattardy olardyń eń muqtaj qajettiligin sheship beretinin aıtyp, aldaıdy. Mundaı áleýmettik problemalar qatarynda jer telimin, jeńildikpen páter, bankten kedergisiz tez arada nesıe alý, jumysqa ornalasý sekildi jaǵdaılar bar», - dedi Qyzylorda qalasynyń prokýrory Ashat Bekmuhanov.

Qyzylorda qalasynyń №2 sotynda bıyl 505 qylmystyq is qaralǵan. Onyń ishinde 101-i alaıaqtyq qylmys retinde tirkelgen. Sotta qaralǵan árbir besinshi is alaıaqtyq qylmys bolyp tabylady.

Budan buryn Qyzylordada túrmede jatyp, terrorızmdi nasıhattaǵan eki adam anyqtalǵan edi.