Qyzylordada maıdangerlerge kommýnaldyq qyzmet tegin kórsetiledi

QYZYLORDA. QazAqparat - Búgin, Qyzylordada Uly Jeńis kúni merekesine oraı arnaıy is-sharalar uıymdastyryldy. Aldymen «Jasampaz jasaqtyń» dástúrli sherýi ótse, artynan «Taǵzym alańy» memorıalyna gúl shoqtaryn qoıý rásimi jasaldy, dep habarlaıdy QazAqparat tilshisi.

Oblys ákimi Qyrymbek Kósherbaev aımaq turǵyndaryn merekemen quttyqtap, soǵysqa qatysýshylardyń erligi urpaq jadynda máńgi qalatynyn atap ótti.

«Soǵys jyldary maıdanǵa 70 myńnan astam qyzylordalyq attansa, búgingi kúni 37 ardager qaldy. Ekinshi dúnıejúzilik soǵystyń qaharmandary arasynda kóptegen jerlesterimiz bolǵanyna maqtanamyz. Óskeleń urpaq jaýyngerler men tyl eńbekkerleriniń aýyzbirshili men erligi, erekshe tabandylyǵy men Otanǵa degen ystyq seziminiń arqasynda Uly Jeńiske qol jetkizgenimizdi bilýi tıis», - dedi aımaq basshysy.

Esterińizge sala keteıik, óńirimizde 37 Uly Otan soǵysynyń ardagerleri men múgedekteri jáne 5726 tyl eńbekkeri bar. Merekege oraı Syr óńirinde 37 ardagerge 192400 teńgeden beriledi. Sondaı-aq, soǵys jyldarynda janqııarlyq eńbegi men minsiz qyzmeti úshin KSRO-nyń ordenderi men medaldarymen nagradtalǵan adamdarǵa 120250 teńgeden tabystalady. Oǵan qosa Uly Otan soǵysy jyldarynda keminde alty aı qyzmet etken adamdarǵa da bir jolǵy materıaldyq kómek kórsetiledi. Sondaı-aq, maıdangerlerdiń tegin demalys oryndarynda demaldyrý, emdetý, jyl boıyna kommýnaldyq qyzmet shyǵyndaryn óteý oblystyq bıýdjet tarapynan sheshilýde. Odan bólek, 1 mamyr kúninen bastap jyl aıaǵyna deıin qazaqstandyq ardagerler «Jeńis» qaıyrymdylyq jobasy aıasynda TMD elderi boıynsha saıahattaı alady.

Ádiljan Úmbet