Qyzylordada masań kúıde júrgen ınspektsııa basshysy jazalandy
QYZYLORDA. QazAqparat - Qyzylorda oblysy, Jańaqorǵan aýdandyq aýmaqtyq ınspektsııa basshysyna Ádep kodeksinde kózdelgen tártiptik teris qylyqtarǵa jol bergeni úshin eskertý túrindegi tártiptik jazasy berildi, dep habarlaıdy QazAqparat.
Qyzylorda oblystyq memlekettik qyzmet isteri jáne sybaılas jemqorlyqqa qarsy is-qımyl departamentiniń habarlaýynsha, elimizdiń veterınarııalyq baqylaý jáne qadaǵalaý komıtetiniń Qyzylorda oblystyq aýmaqtyq ınspektsııasy Jańaqorǵan aýdandyq aýmaqtyq ınspektsııasynyń basshysy qoǵamdyq orynda masań kúıde júrgen. Osyǵan oraı QR ákimshilik quqyq buzýshylyq kodeksiniń 440-babynyń 1-bóligimen ákimshilik is qozǵaldy. Oǵan aýdandyq sottyń qaýlysymen 6012 teńge kóleminde aıyppul salynǵan.
Qyzylorda oblysyndaǵy Ádep jónindegi keńestiń kezekti otyrysynda aýdandyq aýmaqtyq ınspektsııanyń basshysynyń tártiptik isi qaraldy.
«QR memlekettik qyzmetshileriniń ádep kodeksiniń» 5-tarmaǵynyń 13- tarmaqshasynda «Memlekettik qyzmetshiler jasaǵany úshin zańnamada tártiptik, ákimshilik nemese qylmystyq jaýaptylyq kózdelgen quqyq buzýshylyqtar men teris qylyqtardy jasaýǵa jol bermeýi tıis» dep kórsetilgen. Sondaı-aq, sol kodekstiń 7-tarmaǵynyń 1-tarmaqshasynda «Memlekettik qyzmetshiler qyzmetten tys ýaqytta jalpy qabyldanǵan moraldyq-ádeptilik normalaryn ustanýǵa, qoǵamǵa jat minez-qulyq, onyń ishinde qoǵamdyq oryndarda adamnyń qadir-qasıetin jáne qoǵamdaǵy adamgershilikke nuqsan keltiretin masań kúıde bolý jaǵdaılaryna jol bermeýge tıis» dep kórsetilgen», - dedi Qyzylorda oblystyq memlekettik qyzmet isteri jáne sybaılas jemqorlyqqa qarsy is-qımyl departamenti basshysynyń orynbasary Berikbol Baıhojaev.
Tártiptik isti qaraý nátıjesimen QR memlekettik qyzmetshileriniń Ádep kodeksinde kózdelgen tártiptik teris qylyqtarǵa jol bergeni úshin Jańaqorǵan aýdandyq aýmaqtyq ınspektsııasynyń basshysyna eskertý túrindegi tártiptik jazasy berildi.
