Qyzylordada marıhýana egilgen iri alqap anyqtaldy
QYZYLORDA. QazAqparat- 1 maýsym - 30 qazan aralyǵynda respýblıka aýmaǵynda júrgizilip jatqan «Kóknar» jedel-profılaktıkalyq sharasy aıasynda qyzylordalyq polıtseıler esirtki alqabyn anyqtap, kúdiktilerdi qamaýǵa aldy. Bul týraly QazAqparat tilshisi oblystyq ІІD silteme jasap habarlaıdy.
18 qyrkúıek kúni oblystyq ІІD Esirtki bıznesine qarsy kúres basqarmasy men Jalaǵash aýdandyq ishki ister bóliminiń qyzmetkerleri birlesken shara barysynda Jalaǵash aýdany, Jańadarııa aýyldyq okrýginen 80 shaqyrym qashyqtyqta jasyl tústi, ózine tán ıisi bar shóptektes zatty tasymaldap kele jatqan 47, 28, 30 jáne 41 jastaǵy tórt azamatty ustady. Anyqtalǵan zatqa saraptama taǵaıyndalyp, nátıjesinde salmaǵy 44 kelini quraıtyn «keptirilgen marıhýana» ekendigi naqtylandy.
Tergeý barysynda ustalǵan azamattar esirtki zatyn egip-baptaýmen aınalysatyndyǵy belgili boldy. Ózderi kórsetken alqaptan 1147 túp sora ósimdigi anyqtaldy. Saraptama qorytyndysymen onyń esirtki zaty ekendigi jáne salmaǵy 1 tonna 41 kelini quraıtyndyǵy naqtylandy.
Qazirgi tańda, atalǵan tórt azamat Jalaǵash aýdandyq ІІb-niń Ýaqytsha ustaý abaqtysyna qamaqqa alynyp, olardyń ústinen Qazaqstan Respýblıkasy Qylmystyq kodeksiniń 300-baby 2-bóligi jáne 296-baby 4-bóligi boıynsha qylmystyq ister qozǵaldy. Sotqa deıingi tergep-tekserý amaldary júrgizilýde.
