Qyzylordada «Máńgilik mádenıet» jobasy qolǵa alyndy
Atalmysh is-shara ulttyq dástúrimizdi kózdiń qarashyǵyndaı saqtap, ony baıytý jáne qaıta jańǵyrtý, jastardy ulttyq rýhta tárbıeleý maqsatynda júzege asyrylady. Sondaı-aq, talantty jastardyń ónerin qoldaı otyryp qala mádenıeti men ónerin damytýǵa kóńil bólinedi.
«Osy oraıda jaz mezgilinde qala qonaqtary men turǵyndarynyń, ásirese, jastardyń bos ýaqytyn tıimdi jáne qyzyqty ótkizý úshin Qyzylorda qalasyndaǵy «Aray city mall» saýda jáne oıyn-saýyq kesheniniń foıesinde aptasyna bir márte qalalyq mádenıet jáne tilderdi damytý bólimine qarasty mádenıet úıleri ónerpazdarynyń kontserttik baǵdarlamasyn uıymdastyrý qolǵa alynyp otyr», - dedi Qyzylorda qalalyq mádenıet jáne tilderdi damytý bóliminiń mamandary.
«Máńgilik mádenıet» jobasy aıasynda jergilikti «Syrly saz» halyqtyq-folklorlyq ansambliniń «Dombyra-dastan» atty kontsertin kópshilik nazaryna usyndy. Atalmysh óner ujymy túrli deńgeıdegi kóptegen sharalarda óner kórsetip keledi. Halyqtyq-folklorlyq ansambliniń repertýarynda kúı atasy - Qurmanǵazynyń «Balbyraýyn», «Adaı», «Saryarqa», «Serper» kúılerimen qatar, dáýlesker kúıshi N. Tilendıevtiń «Álqıssa», «Ata tolǵaý», Dáýletkereıdiń «Kóruǵly», Túrkeshtiń «Kóńilashar» kúıleri bar. Sondaı-aq, kontserttik baǵdarlama barysynda ártúrli kúıler toptamasynan kúı-tartys uıymdastyrylady.
Byltyrdan beri Qyzylorda qalasyndaǵy Ortalyq alań mańyndaǵy «Óner arbaty» boıynda kóptegen is-sharalar uıymdastyryldy. Onda ónerpazdar kúz mezgiline deıin apta saıyn san alýan sharalardy ótkizýdi josparlap otyr.
Budan buryn Syr óńirindegi kóne Qyshqala qalashyǵyn zertteýshiler jańa derekterge qol jetkizgenin habarlaǵan edik.
