Qyzylordada mánerlep syrǵanaýdan respýblıkalyq jarys ótedi
QYZYLORDA. QazAqparat - Qyzylordada sáýir aıynda mánerlep syrǵanaýdan belgili sportshy Elızabet Tursynbaevanyń júldesine arnalǵan respýblıkalyq jarys ótedi, dep habarlaıdy QazAqparat tilshisi.
Bul jaǵymdy jańalyq oblystyq konkı sporty federatsııasynyń kezekten tys otyrysynda belgili boldy. Oǵan Elızabettiń ákesi Baıtaq Tursynbaev ta qatysty.
Elızabet Tursynbaeva 2000 jyldyń 14 aqpanynda Reseı astanasy - Máskeý qalasynda dúnıege kelgen. Onyń ákesi - Baıtaq Tursynbaev Qyzylorda oblysynyń týmasy. Elızabet elimizdegi jarystarda Syr óńiriniń atynan shyǵady.
Osydan onshaqty jyldaı buryn Máskeýdegi «Moskvıch» eksprımenttik joǵary sport sheberligi mektebinde tálim aldy. Sondaı-aq, Elızabet Almaty qalasynyń daryndy balalarǵa arnalǵan mektep-ınternaty men Máskeýdegi ortalyq áskerı-sporttyq klýbynda jattyqqan. 2012 jyly atalmysh qaladaǵy №37 balalar men jasóspirimder olımpıadalyq rezervter mektebinde sheberligin jetildirdi.
Elızabet 2018 jyly tuńǵysh ret eresekter arasyndaǵy qysqy Olımpıada oıyndarynda baq synady. Onda jekeleı synda Elızabet Tursynbaeva jalpy esepte 12-oryn aldy. 2019 jyly álem chempıonatynda kúmis júldeger boldy. Sol jyly qysqy ýnıversıadada da sol jetistigin qaıtalady.
https://kaz.inform.kz/news/universiada-elizabet-tursynbaeva-kumis-zhuldeger-atandy_a3505670
Ol reseılik maman Eterı Týtberıdzemen 2012-2013 jyldarda da jattyqqan edi. Odan keıingi bes jylda kanadalyq maman Braıan Orserden tálim aldy. Elızabet byltyrdan bastap qaıtadan Eterı Týtberıdzeden tálim ala bastady.
