Qyzylordada mamandardy úsh aýysymdy mektepter máselesi alańdatyp otyr
Óńirde mektepterdiń tyǵyzdyq máselesi salaýatty bilim berýdegi ózekti problema sanalady. Oblystaǵy 12 mektepte tyǵyzdyq kórsetkishi normadan joǵary bolyp otyr.
Sanıtarııalyq qaǵıda talaptary boıynsha ár synypta 25 baladan aspaýy tıis. Atalǵan mektepterde ol 30-35 oqýshyny quraıdy.
«Qyzylorda qalasyndaǵy 6 mektepte oqý protsesi úsh aýysymda júrgiziledi. Bul sanıtarııalyq-epıdemıologııalyq qyzmet mamandaryn alańdatyp otyr. Mundaı jaǵdaıda oqý qarapaıym sanıtarııalyq-epıdemıologııalyq talaptyń, ylǵaldy jýyp-shaıý, aýa almasý, karantın rejıminiń buzylýyna ıtermeleıdi. Saldarynan olarda juqpaly jáne parazıtarlyq aýrýlardyń toptasqan jaǵdaıynyń taralý qaýpi artady. 2021-2022 oqý jylynda balalar arasynda koronavırýs ınfektsııasy kóptep tirkeldi. Atap aıtqanda, ol úsh aýysymda bilim beretin Abaı atyndaǵy mektep-lıtseıde 9, №3 mektep-lıtseıde 14, №101 mektepte 8, № 264 mektepte 7 jaǵdaıdy qurady», - dep málim etti Qyzylorda oblysynyń sanıtarııalyq-epıdemıologııalyq baqylaý departamentinen.
Mamandardyń aıtýynsha, sabaqtyń gıgıenalyq turǵydan ratsıonaldy, ońtaıly qurylymy oqýshylar júktemesiniń azaıýyna, sáıkesinshe júrek-qantamyr júıesiniń fýnktsıonaldy qalpynyń buzylmaýyna jol ashady. Ol aýrýshańdyqty azaıtýǵa, sabaq úlgeriminiń artýyna oń áserin tıgizedi.
Eske salsaq, budan buryn Qyzylordada sabaq kestesin durys uıymdastyrmaǵan mektepterge aıyppul salyndy.
