Qyzylordada mal baǵyp júrip joǵalǵan bala qoılarmen birge elsiz dalada túnegen
Eske salsaq, oqıǵa 16 qarashada Qazaly aýdanyna qarasty Ajar eldi mekeninde tirkeldi.
2009 jylǵy bala sol kúni 9.00 shamasynda eldi mekenniń kezekpen baǵylatyn qoıyn jaıýǵa shyqqan. Aldynda 200-ge tarta qoı bolǵan.
Odan keıin shyǵys betkeıdegi 10-15 shaqyrymda ornalasqan «Úshaǵash» degen mal jaıylymdyq jerge qaraı baǵyt alǵan.
Sodan bir kún boıy habarsyz ketken .
Joǵalǵan bala búgin, 17 qarashada aýyl mańyndaǵy Qańbaqshal ýchaskesinen aman-esen tabyldy. Bul jóninde aýdan ákimdigi habarlady.
«Bul oqıǵa aýdan ákimdiginiń tikeleı baqylaýynda boldy. Oqıǵa ornyna aýdan ákimi apparatynyń jaýapty mamandary bardy. Іzdeý jumystaryna 10-nan astam avtokólik paıdalanyldy. Aýdandyq polıtsııa bólimi, Janqoja batyr atyndaǵy shekara beketi, aýdandyq tótenshe jaǵdaılar, aýdandyq bilim bólimderi, Qyzylqum aýyldyq okrýgi ákimi apparatynyń qyzmetkerleri men Káýkeı aýylynyń eriktileri, jergilikti turǵyndar izdeýge qatysty. Barlyǵy 50-ge jýyq adam atalǵan sharaǵa jumyldyryldy», - dep málim etti Qazaly aýdany ákimdiginen.
Málim bolǵandaı, bala túngi ýaqytta qoılardyń arasyn panalap jatqan. Ótken táýlikte óńirde qar jaýyp, aýa raıy kúrt sýytyp ketti.
