Qyzylordada maqta tıelgen júk kóligi órtenip ketti
QYZYLORDA. QazAqparat - Qyzylorda oblysy aýmaǵynda Ózbekstannan Ýkraınaǵa bet alǵan júk kóligindegi taýarlar tolyqtaı órtenip ketti, dep habarlaıdy QazAqparat tilshisi.
Oqıǵa Samara-Shymkent tas jolynyń Aral aýdany aýmaǵyndaǵy 1338 shaqyrymynda boldy. Ózbekstannan Ýkraınaǵa bara jatqan «Volvo» júk kóligindegi 21 tonna maqta tolyqtaı janǵan.
Kólik ishinde eki adam bolǵan. Onyń biri - kólik júrgizýshisi, ekinshisi - júrgizýshiniń kómekshisi.
«Bul jóninde habar kelgennen keıin eń jaqyn órt sóndirý bóliminiń mamandary jumyldyryldy. Qashyqtyq 34 shaqyrymdy quraıdy. Oqıǵa ornyna 2 tehnıkamen 7 qyzmetker jedel jetti. Órt jyldam oqshaýlandy. Oqıǵa barysynda jaraqat alǵan adam joq. Qazirgi tańda órttiń shyǵý sebebi men shyǵyny anyqtalýda», - dedi Qyzylorda oblystyq Tótenshe jaǵdaılar departamenti Órt sóndirý jáne avarııalyq-qutqarý jumystary qyzmetiniń baspasóz hatshysy Álııa Erejepova.
Eske salsaq, budan buryn Qyzylorda oblysynda qorada jınalyp turǵan 3000 baý shóp órtenip ketti.
