Qyzylordada Mádenıet úıine 250-ge jýyq kópbalaly ana jınaldy
QYZYLORDA. QazAqparat - Senbi, 9 aqpan kúni tańerteń Qyzylordadaǵy A. Toqmaǵambetov atyndaǵy qalalyq mádenıet úıinde kópbalaly jáne jalǵyz basty analardy qabyldaý uıymdastyryldy. Áıelderdi memlekettik organdardyń basshylary qabyldap, tyńdady, dep habarlaıdy QazAqparat.
Qyzylorda oblysy ákiminiń baspasóz qyzmetinen málim etkendeı, Ashyq esik kúnine óńir ákiminiń orynbasarlary, Qyzylorda qalasynyń ákimi, oblystyq máslıhat hatshysy men «Nur Otan» partııasy oblystyq fılıaly tóraǵasynyń orynbasary, sondaı-aq oblystyq basqarmalardyń basshylary qatysty. Qabyldaý qorytyndysy boıynsha olardyń baılanys aqparaty men ótinish-usynystary jóninde málimetter bazasy qurylatyn bolady.
«Tańerteńnen bastap azamattardy qabyldaý júrgizilýde, kelýshilerdiń basym kópshiligi - kópbalaly jáne jalǵyz basty analar, bastapqyda túsinispeýshilik oryn alyp, jaǵdaı shıelenispen bastalǵan bolatyn. Biraq biz ortaq sheshimge kelip, aıqaı-shýmen másele sheshilmeıtinin aıtylyp, mán-jaıdy birlesip sheshýge kelistik. Jınalǵan turǵyndarǵa Qyzylorda oblysy ákiminiń orynbasarlary men Qyzylorda qalasy ákiminiń qabyldaýynda óz talap-tilekterin jazyp qaldyrý usynyldy», - dedi Qyzylorda oblysy ákiminiń orynbasary Qýanyshbek Ysqaqov.
Qabyldaýǵa 250-ge jýyq kópbalaly ana kelgen. Olardyń negizgi suraqtary: «kópbalaly ana» jáne «jalǵyz basty ana» sanattary úshin tegin turǵyn úı jáne birqatar jeńildikter berý, mysaly, kommýnaldyq qyzmetter, salyqtar, járdemaqylardy arttyrý jáne ózge de áleýmettik tólemaqylar taǵaıyndaý. Árbir kelýshiniń suraqtary boıynsha túsinikteme berildi. Máseleleri ári qaraı talqylanatyn bolady, sodan soń jaýaby joldanady.
Budan buryn barlyq óńirlik BAQ-ta, áleýmettik jelilerdegi jáne ınternet-resýrstaryndaǵy resmı akkaýnttarda Ashyq esik kúnin ótkizý týraly aqparat jarııalanǵanyn atap ótken jón. Sonymen qatar, 6 aqpan kúni oblys ortalyǵynda qala ákiminiń orynbasarlary men qalalyq bólimderdiń basshylary kún saıyn kópbalaly áıelderdiń muqtajdyqtary men usynystaryn anyqtaý maqsatynda qabyldaý ótkizgen bolatyn.
Sondaı-aq, oblys boıynsha kópbalaly otbasylardy aralap, birinshi kezektegi qajettilikterin anyqtady. Olardyń máselelerin sheshý joldaryn qarastyrýǵa baǵyttalǵan arnaıy komıssııa jumysyn bastady.
Atap ótilgendeı, A. Toqmaǵambetov atyndaǵy qalalyq mádenıet úıindegi qabyldaý sońǵy kelýshige deıin jalǵasty.
Esterińizge sala keteıik, Memleket basshysynyń tapsyrmasymen qazaqstandyqtardyń ómir súrý sapasyn jaqsartý boıynsha QR Premer-Mınıstriniń orynbasary Erbolat Dosaevtyń basshylyǵymen jumys toby quryldy.
Búginde Qyzylorda oblysynda 35 myńnan astam kópbalaly otbasy bar. Barlyq otbasylarǵa járdemaqy ýaqytyly tólenýde. 2018 jyly áleýmettik qorǵalmaǵan otbasylardan shyqqan 25 232 oqýshy tegin ystyq tamaqpen qamtyldy, 17420 oqýshy jalpy bilim berý qorynyń qarajaty esebinen kıimmen qamtamasyz etildi, 10295 oqýshyǵa demalys lagerlerine joldama berildi. Budan bólek, «Qamqorlyq» aktsııasy aıasynda az qamtylǵan otbasynan shyqqan 1591 stýdent shákirtaqy alady, tegin ystyq tamaqpen qamtylyp, qoǵamdyq kólikte tegin júredi. Aqyly negizde oqıtyn halyqtyń áleýmettik qorǵalmaǵan toptarynyń stýdentterine oqýǵa 50 paıyz jeńildik jáne birinshi kezekte jataqhanadan oryn beriledi.
2013 jyldan bastap az qamtylǵan jáne kópbalaly otbasylardan, ásirese aýyldyq jerlerden shyqqan balalardy oqytýǵa ákim granty taǵaıyndalǵan. Atalmysh granttardyń 900-ge jýyq ıegeri elimizdiń jetekshi JOO-da bilim alady.
