Qyzylordada lombard qyzmetkeri jumys ornynan altyn urlap, polıtsııa shaqyrtty
QYZYLORDA. QazAqparat - Qyzylorda qalasynda lombardta isteıtin azamatsha urlaǵan altyn buıymdaryn jasyrý úshin óziniń jumys ornyna qaraqshylyq shabýyl jasaǵanyn habarlaǵan, dep habarlaıdy QazAqparat tilshisi.
Atalmysh lombard Qyzylorda qalasyndaǵy saýda ortalyǵynyń birinde ornalasqan. Saǵat kúndizgi 10-00-der shamasynda jergilikti polıtsııaǵa atalmysh orynǵa qaraqshylyq shabýyl jasalǵandyǵy jóninde habar túsken. Onda belgisiz bireý lombard ǵımaratyna basa-kóktep kirip, ondaǵy baǵaly zattardy urlap ketkeni aıtylǵan.
«Tergep-tekserý barysynda eshqandaı qaraqshylyq shabýyl jasalmaǵany anyqtaldy. Kassadaǵy aqshany jábirlenýshiniń ózi urlaǵandyǵy belgili boldy. Tekseris bolatyndyǵyn bilgen ol altyn buıymdardy aldyn-ala urlaǵan. Sosyn tártip saqshylaryna qaraqshylyq qylmysy jaıly habar bergen. Óz-ózine pyshaq jaraqatyn salǵan. Tekserý barysynda jábirlenýshi óz kinásin tolyq moıyndady. Onyń turǵylyqty jeri boıynsha kómip tastaǵan altyn buıymdar zattaı dálel retinde alyndy», dep jazylǵan oblystyq ishki ister departamenti taratqan habarlamada.
Qazirgi tańda oǵan qatysty kórineý jalǵan aıǵaqtar kórsetý deregi boıynsha, Qazaqstan Respýblıkasynyń Qylmystyq Kodeksiniń 420-babynyń, 2-bóligimen tergep tekserý amaldary júrgizilýde. Kúdikti azamatshanyń kinási dáleldengen jaǵdaıda oǵan sot sheshimimen bes jyldan on jylǵa deıingi merzimge bas bostandyǵynan aıyrylý jazasy taǵaıyndalýy múmkin.
