Qyzylordada lager balalardyń jazǵy demalysyn durys uıymdastyrmaǵan

QYZYLORDA. QazAqparat - Qyzylordada balalardyń jazǵy tynyǵýyn durys qamtamasyz etpegen lagermen kelisimshart buzyldy, dep habarlaıdy QazAqparat tilshisi.

Áleýmettik jelide Qyzylorda qalasy A. Taımanov №15 úı mekenjaıynda ornalasqan «Syr tóresi» jeke lagerine qatysty másele kóterilgen edi.

Onda balalardyń jazǵy tynyǵýy durys uıymdastyrylmaǵany aıtylǵan. Lagerde oqýshylardyń demalysyna eshqandaı jaǵdaı jasalmaǵan.

Bul jóninde oblystyq bilim basqarmasy resmı túsinikteme berdi.

«Qazirgi tańda aımaǵymyzda oblystyq sanıtarlyq-epıdemıologııalyq baqylaý departamentiniń sáıkestik jónindegi qorytyndysy bar 7 memlekettik jáne bir jeke tynyǵý lageri («Zerentaı» jeke lageri) jumys istep tur. Balalardyń jazǵy tynyǵýyn uıymdastyrý maqsatynda QR Memlekettik satyp alý týraly zańyna sáıkes qalalyq jáne aýdandyq bilim bólimderi konkýrs jarııalaǵan bolatyn», - dep málim etti Qyzylorda oblystyq bilim basqarmasynan.

Vedomstvo málimetinshe, konkýrs nátıjesimen joǵaryda atalǵan lagerlermen qosa, «Syr tóresi» jeke lageri de jeńimpaz atanyp, kelisimshart jasalǵan.

«Tapsyrys berýshi tarapynan «Syr tóresi» jeke lagerine qarjy aýdarylmaǵan. Búgingi kúni «Syr tóresi» jeke lageriniń talaptardy oryndamaýyna baılanysty ekijaqty kelisimshartty buzý jumysy júrgizilip jatqanyn jetkizemiz. Atalmysh lagerden barlyq balalar qaıtarylyp, olar tıisinshe jazǵy tynyǵýmen qamtamasyz etiledi», - dedi basqarma.