Qyzylordada Qyzyl kitapqa engen qaraquıryqty aýlaǵan brakonerler ustaldy

QYZYLORDA. QazAqparat - Qyzylordada tabıǵat qorǵaý ınspektorlary teksergen kólikten Qyzyl kitapqa engen qaraquıryqtyń ushasy tabylǵan. Alaıda taǵy eki adam kelip ınspektorlarǵa myltyqtan oq atyp, qaraquıryq ushasyn tartyp alyp ketken, dep habarlaıdy QazAqparat Ekologııa, geologııa jáne tabıǵı resýrstar mınıstrliginiń Telegram kanalyna silteme jasap.

Brakonerliktiń jolyn kesý boıynsha reıd barysynda «Ohotzooprom» RMK Qyzylorda oblysy boıynsha fılıalynyń ınspektorlary Jalaǵash aýdanynyń Tógisken jerinde Shardara aýdanynyń Shákili aýylynyń turǵynyn ustaǵan.

«Tekserý kezinde ustalǵan adamnyń kóliginen Qyzyl kitapqa engizilgen qaraquıryqtyń ushasy tabyldy. Kúdikti ustalǵan jerge jedel-tergeý toby shaqyryldy. Inspektorlar polıtsııa qyzmetkerlerin kútip turǵanda Qyzylorda qalasynyń eki turǵyny oqıǵa ornyna kelip, ınspektorlardyń qyzmettik kólikteriniń biriniń dóńgelegine myltyqtan oq atqan. Sodan keıin ınspektorlarǵa qaýip tóndirip, qaraquıryq ushasyn alyp ketken», delingen habarlamada.

Uzamaı ınspektorlar men quqyq qorǵaý organdarynyń qyzmetkerleri oq atqan brakonerlerdi de ustady. Atalǵan fakti boıynsha QR Qylmystyq kodeksiniń 337-babynyń 4-tarmaǵy («Zańsyz ań aýlaý») jáne 380-babynyń 2-tarmaǵy («Bılik ókiline qatysty zorlyq-zombylyq qoldaný») boıynsha Jalaǵash aýdandyq polıtsııa bólimshesinde qamaýǵa alyndy.

Eske sala ketsek, ótken aptada Qyzylordada tabıǵat qorǵaý ınspektorlaryna oq atqan eki adam ustalǵany habarlandy.