Qyzylordada qyzmettik kólikti jeke maqsatta paıdalanǵan sheneýnikter nazarǵa ilikti
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamentiniń baspasóz hatshysy Baǵdat Ábdiqadyrovtyń habarlaýynsha, azamattyq qoǵam ókilderi men belsendi blogerler qyzmettik avtokólikterdi paıdalanýdy baqylaýǵa alyp, reıd júrgizgen. Nátıjesinde 15 qyzmettik avtokóliktiń qyzmetten tys maqsatta paıdalanylǵany anyqtalyp otyr.
«Naqtyraq aıtqanda, qyzmettik maqsatta paıdalanylýy tıis memlekettik mekemelerdiń avtokólikteri memqyzmetshiler men olardyń otbasy múshelerin saýda úılerine, balabaqshalarǵa, mektepterge tasyǵan. Osy jaıttar reıdtik toptyń nazaryna ilinip, tıisti sharalar qoldanylý úshin usynymdar berildi», - deıdi Baǵdat Ábdiqadyrov.
Aıta keteıik, reıdtik toptaǵy azamattyq qoǵam ókilderi bul jumystardyń aldaǵy ýaqytta da turaqty túrde júrgiziletinin málimdep otyr.