Qyzylordada qyz alyp qashqan jigitter sottaldy

QYZYLORDA. QazAqparat - Qyzylorda qalasynda boıjetkendi erkinen tys alyp qashýǵa nıettengen jigitterge qatysty sot úkimi shyqty, dep habarlaıdy QazAqparat tilshisi.

Atalmysh oqıǵa 2018 jyldyń shilde aıynda oryn alǵan. Jigitterdiń biri eki aýyldasymen kezdesip, óziniń úılený jóninde oıy bar ekenin aıtady. Úsheýi ózara kelisip, Qyzylorda qalasyna keledi.

Úılenýge bekingen jigit óziniń buryn júrgen qyzynyń úıiniń mańyn torýyldaıdy. Tańerteńgilik ýaqytta jumysyna jaıaý bara jatqan boıjetkenge kezigip ony kólikpen alyp baratynyn aıtyp, minýin suraıdy. Oǵan qarsylyq bildirgen boıjetkendi eki qolynan qysyp ustap, kólikke otyrǵyzady.

Budan keıin úsheýi boıjetkenmen birge ózderi turatyn aýdanǵa qaraı bet alady. Degenmen jol boıynda jyldamdyǵyn asyrǵan kólik júrgizýshisin jergilikti polıtsııa qyzmetkerleri toqtatady. Sol sátte jábirlenýshi polıtsııa qyzmetkerlerinen kómek suraıdy. Boıjetkendi erkinen tys alyp qashqan úsh jigit aýdandyq polıtsııa bólimine jetkizilgen.

«Atalmysh qylmystyq is Qyzylorda qalasynyń №2 sotynda qaraldy. Olardyń ústinen QR Qylmystyq kodeksiniń 125-babynyń 2-bóligi 1-tarmaǵymen is qozǵaldy. Sol boıynsha kináli dep tanylǵan sottalýshylarǵa 7 jylǵa shartty jaza taǵaıyndaldy», - dep málim etti Qyzylorda qalasynyń № 2 sotynyń baspasóz qyzmeti.