Qyzylordada qyrǵyz azamattaryn tonaǵan qylmyskerler quryqtaldy
ASTANA. QazAqparat - Qyzylordalyq polıtseıler qyrǵyz azamattaryn tonaǵan 28 jáne 25 jastaǵy Qarmaqshy aýdanynyń 2 turǵynyn ustady, dep habarlady búgin Qyzylorda oblystyq ishki ister departamentiniń baspasóz qyzmeti.
Oqıǵa 21 kyrkúıek kúni túngi saǵat 03:50 shamasynda Shymkent-Samara tasjolynyń boıynda boldy. Belgisiz bir azamatsha ishki ister bólimine telefon soǵyp, qylmys faktisi týraly habarlaǵan.
Habarlama negizinde jedel túrde sol aýmaqta barlaý jumystaryn júrgizip júrgen jol-patrýldik polıtsııa rotasyna tıisti nusqaý berilip, nátıjesinde 1992 jylǵy jáne 1989 jylǵy 2 azamat ustaldy.
Tergeý barysynda ustalǵan 2 azamat aldyn ala sóz baılasyp, Qyrǵyztan Respýblıkasy azamatynyń basqarýyndaǵy «Mercedes» markaly avtokóligin toqtatyp, avtokóliktiń ishinde bolǵan 4 azamattyń 40000 teńge kólemindegi aqshasyn, 10 dana qosymsha dońǵalaqtaryn jáne uıaly telefondarymen qosa «Kama» úlgisindegi velosıpedin urlaǵandary belgili boldy.
Atalǵan derek Qazaqstan Respýblıkasy Qylmystyq kodeksiniń 191-baby, 2-bóligi, 1,3-tarmaǵy boıynsha Sotqa deıingi tergep-tekserýdiń biryńǵaı tizilimine tirkelip, tergeý amaldary júrgizilýde.
