Qyzylordada qylmys jasaǵan 5 azamatqa qatysty úkim shyqty
QYZYLORDA. QazAqparat - Qyzylorda oblysynyń qylmystyq ister jónindegi mamandandyrylǵan aýdanaralyq sotynda bes sottalýshyǵa qatysty úkim shyqty. Zań aldynda jaýapqa tartylǵandardyń biri kámeletke tolmaǵan.
Qylmys oryn alǵan kúni sottalýshy R. ózine tıesili avtokóligimen qalada serýendep júrgen. Janynda 4 dosy bolǵan. Bókeıhan kóshesiniń boıynda ornalasqan káýaphana tusynan toqtaǵan jastar, sol mańda turǵan jábirlenýshilermen kerisip qalǵan. Janjaldyń sońy tóbeleske ulasypty. Basty sottalýshynyń 3 dosy qarsylastaryn taspen uryp, jeńil jaraqat salǵan. Al, R. eki azamatty pyshaqpen jaraqattap, densaýlyqtaryna zalal keltirgen. Tergeý kezinde qamaýǵa alynǵan qyzylordalyqtar óz kinálaryn tolyqtaı moıyndady.
«Sot úkimimen sottalýshy R. «eki nemese odan da kóp adamdy óltirýge oqtalǵany» úshin kináli dep tanylyp, 11 jyl 3 aıǵa bas bostandyǵynan aıyryldy. Al, kámeletke tolmaǵan jasóspirim QR Qylmystyq kodekstiń 293 baby boıynsha aıypty dep tanylǵanymen, zańǵa sáıkes qylmystyq jaýapkershilikten bosatyldy. Al qalǵan úsh azamattyń jábirlenýshilermen ózara tatýlasýyna baılanysty qylmystyq isteri toqtatyldy», - dep málimdedi Qyzylorda oblysynyń qylmystyq ister jónindegi mamandandyrylǵan aýdanaralyq sotynyń baspasóz qyzmeti.
Aınur Tóleshova
