Qyzylordada kúzet qyzmetkeriniń kıimin zańsyz kıgen 3 azamat jaýapqa tartyldy
QYZYLORDA.QazAqparat-Memleket basshysy 2016 jyldyń 22 jeltoqsanynda «Qazaqstan Respýblıkasynyń keıbir zańnamalyq aktilerine ekstremızmge jáne terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zańyna qol qoıyp, sonyń negizinde Ákimshilik quqyq buzýshylyq týraly kodeksine jáne «Kúzet qyzmeti týraly» zańǵa ózgerister engizilgen bolatyn. Bul týraly QazAqparat HAA tilshisi.
Atap aıtqanda, ÁQBtK-niń 675-babynda jeke kúzet uıymynyń kúzetshi laýazymyn atqaratyn jumysshynyń arnaýly kıimin oǵan quqyǵy joq adamdardyń zańsyz kıip júrgeni (paıdalaný) úshin jeke adamdarǵa ákimshilik-quqyqtyq yqpal etý sharasy kózdeletindigi kórsetilgen.
Zań talabyn iske asyrý maqsatynda jyl basynan beri Qyzylorda OІІD Kúzet qyzmetin baqylaý bólimi men aımaqtyq polıtsııa ınspektorlary birlesip kúzet uıymy qyzmetkerleri arasynda túsindirý jumystaryn júrgizip, zań talaptaryna baǵynbaǵan jaǵdaıda qodanylatyn jaýapkershilik jaıyn túsindirdi.
Degenmen, tıisti tekseris jumystary barysynda zańbuzýshylyqqa jol bergen azamattar da anyqtaldy. Atap aıtqanda, memlekettik emes uıymdarda qaraýyl bolyp jumys atqaratyn Qyzylorda qalasynyń úsh turǵyny kúzetshilerge tıesili «KÚZET» degen jazýy bar arnaıy nysandy kıimin kıip júrgeni úshin ákimshilik jaýapkershilikke tartyldy.
Olarǵa qatysty QR ÁQBtK-niń 675-baby 3-bóligine sáıkes hattama toltyrylyp, 5 aılyq eseptik kórsetkish kóleminde aıyppul salyndy. OІІD Kúzet qyzmetin baqylaý bólimimen arnaıy nysandyq kıim kııý tártibin buzǵan azamattardy jaýapkershilikke tartý baǵytynda jumystar jalǵasatyn bolady.
