Qyzylordada kúıdirgi aýrýynyń 60 oshaǵy bar
Aıta keterligi, kúıdirgi Qyzylorda oblysynda sońǵy ret 2008 jyly tirkelgen. Odan beri adamdar men aýyl sharýashylyǵy janýarlary arasynda sibir jarasyna qatysty kúdikti jaǵdaı oryn alǵan joq.
«Búgingi kúnge deıin atalmysh aýrýǵa qarsy egilýge tıis dep josparlanǵan adamdarǵa qarjy bólinbeı keldi. Soǵan baılanysty vaktsınatsııalaý júrgizilmedi. Alaıda, elimizde sońǵy 2 jylda kúıdirgi aýrýy boıynsha epıdemıologııalyq-epızootologııalyq ahýal kúrdelendi. Bul baǵytta Qyzylorda oblysynyń taýarlar men qyzmetterdiń sapasy men qaýipsizdigin baqylaý departamenti mamandary tıisti oryndarǵa másele kóterdi. Nátıjesinde jergilikti atqarýshy organdar tarapynan tıisti qarjy bólinip, oǵan 2250 doza vaktsına satyp alyndy», - dep málim etti Qyzylorda oblysynyń taýarlar men qyzmetterdiń sapasy men qaýipsizdigin baqylaý departamenti basshysynyń orynbasary Álııa Ábdiqaıymova.
Basqarma basshysynyń aıtýynsha, zańnamaǵa sáıkes 2020 jyldyń sáýir-mamyr aılarynda indettiń epıdmaýsymy aldynda egilýge tıisti kontıngentke ekpe salynady.
«Kúıdirgige qarsy josparly vaktsına kimderge salynady? Birinshiden, halyqtyń sanıtarııalyq-epıdemıologııalyq saýlyǵy salasynda, densaýlyq saqtaý, veterınarııa salasynda qyzmet etetin organdar men uıymdardyń mamandary jáne kúıdirgi oshaqtarynda, kúıdirgi qozdyrǵyshyn juqtyrý kúdigi bar materıalmen jumys isteıtin jáne kúıdirgi qozdyrǵyshyna synama alatyn, zertteýdi júrgizetin zerthana mamandaryna salynady. Ekinshiden, vaktsınamen janýarlardy, janýardan alynatyn ónimder men shıkizat daıyndaý (soıý), saqtaý, qaıta óńdeý jáne ótkizýdi júzege asyratyn et óńdeý kásiporyndarynyń, mal soıatyn pýnktilerdiń, mal soıatyn alańdardyń jáne ishki saýda obektileriniń jumyskerleri qamtylady. Mundaı sharalar mal soıý, statsıonarlyq-qolaısyz núkteler aýmaǵynan ákelingen janýardan alynatyn ónimder men shıkizatty jınaý, saqtaý, tasymaldaý jáne alǵashqy óńdeýmen aınalysatyn adamdar arasynda da atqarylady», - dedi Álııa Ábdiqaıymova.
