Qyzylordada «Qutqarýshylar eskertedi» aktsııasy ótip jatyr
QYZYLORDA. QazAqparat - Qyzylordadaǵy «Jibek joly» saýda ortalyǵynda kishkentaı balalarǵa arnap, Qyzylorda oblysy Tótenshe jaǵdaılar departamenti qyzmetkerleri «Abylaı han» kolledjiniń stýdentterimen birge fleshmob bıin bıledi.
Bı-shoýyna balalar men olardyń ata-analary da tartyldy, dep habarlaıdy QazAqparat tilshisi. Іs-shara sońynda azamattyq qorǵaý qyzmetkerleri eresekter men balalarǵa pırotehnıkalyq buıymdardyń órttiń tutanýyna jáne jańa jyldyq kanıkýl kezinde balalardyń jaraqattanýyna sebep bolatyndyǵyn aıtty.
«Qutqarýshylar eskertedi» aktsııasy «Jibek joly», «Jaına» jáne «Sybaǵa» saýda úılerinde, sonymen birge Halyqqa qyzmet kórsetý ortalyǵynda jalǵasyn tapty. Halyqtyń kóp shoǵyrlanatyn oryndarynda qutqarýshylar turǵyndarǵa turmystaǵy órt qaýipsizdigi erejesin saqtaý týraly eskertti.
