Qyzylordada kúshti jel ǵımarattardyń shatyryn ushyryp áketti

QYZYLORDA. QazAqparat - Qyzylorda oblysynda keshe soqqan qatty daýyldyń saldarynan Shıeli jáne Jańaqorǵan aýdandaryndaǵy birqatar áleýmettik nysandardyń shatyry ushyp ketti, dep habarlaıly QazAqparat tilshisi.

Eske salsaq, 21 mamyrda Qyzylorda oblysynda shańdy daýyl men kúshti jel soqty. Aýa-raıynyń qolaısyzdyǵynan birqatar aýdandardaǵy nysandardyń shatyryna zaqym keldi.

«Atap aıtqanda, Shıelidegi 4 mektep pen 1 kolledj, Jańaqorǵan aýdany, Tómenaryq aýylyndaǵy ákimdik, Jamanbaı aýyldyq klýby ǵımarattarynyń shatyry ushyp ketken. Sondaı-aq, sol aýdandarda elektr jelisi úzilip, birneshe eldi mekender jaryqtan ajyraǵan. Elektr jelisin qalpyna keltirý tolyq aıaqtaldy. Oqıǵa ornynda arnaıy mamandar men tehnıkalar shuǵyl túrde jumyldyryldy. Zardap shekken azamattar joq. Nysandarda kezekshilik uıymdastyryldy», - dep málim etti Qyzylorda oblysy ákimdiginiń baspasóz qyzmeti.

Vedomstvo málimetinshe, atalǵan másele oblys ákiminiń tikeleı baqylaýynda. Qazirgi tańda qalypqa keltirý jumystary júrgizilip jatyr.