Qyzylordada qurylys salasynda tsıfrlandyrý baǵytynda mańyzdy jobalar engizilip jatyr
Bul týraly Qyzylorda oblysynyń memlekettik sáýlet- qurylys baqylaýy basqarmasynyń basshysynyń mindetin atqarýshy Marat Myrzabekov jýrnalısterge málimdedi.
Tuńǵysh Prezıdent - Elbasy Nursultan Nazarbaevtyń 2018 jylǵy 5 qazandaǵy Qazaqstan halqyna Joldaýynda ınnovatsııalyq jáne servıstik sektorlardy damytýǵa erekshe kóńil bólý qajettigi atap kórsetilgen.
«Osy baǵyttaǵy «TexStroi-Smart» jobasy oblys kólemindegi tehnıkalyq qadaǵalaý sarapshylaryna ońtaıly bolyp otyr. Joba boıynsha aı saıynǵy esepterdi basqarmaǵa kez kelgen jerden elektrondy túrde joldaýyna múmkindik jasaıdy. Taǵy bir tıimdiligi basqarma qyzmetkerleriniń kásipkerlik sýbektilerimen tikeleı qarym-qatynasta bolý túrindegi sybaılas jemqorlyq táýekeli joıyldy»,-dedi Qyzylorda oblysynyń memlekettik sáýlet- qurylys baqylaýy basqarmasynyń basshysynyń mindetin atqarýshy Marat Myrzabekov.
Onyń sózinshe, qurylys salasyna engen «Halyq Monitoring» jobasy boıynsha salynyp jatqan qurylys nysandary týraly barlyq derekterdi arnaıy saıtta ornalastyrý arqyly oǵan halyqtyń qoljetimdiligin, ashyqtyǵyn qamtamasyz etýge jol ashyldy. Bul joba qurylystyń sapasyna qatysty turǵyndarmen keri baılanys ornatý jolymen bolǵan zańbuzýshylyqtardy der kezinde joıýǵa jaǵdaı jasaýdy kózdeıdi. Bul óz kezeginde baqylaý sharalarynyń tıimdiligin arttyrýǵa, qurylys jumystarynyń sapaly oryndalýyna jol ashady.
Aıta keteıik, basqarma tarapynan kórsetiletin 5 túrli memlekettik qyzmettiń 4-ýi elektrondy júıe «E-lıtsenzııa» portalyna kóshirilip, turǵyndarǵa 299 qyzmet kórsetilgen. Onyń 125-i sarapshylyq qyzmetke attestattaýǵa, 174-i lıtsenzııalaýǵa baǵyttalǵan.