Qyzylordada qurylys materıaldaryn talan-tarajǵa salǵan basshyǵa úkim shyqty
QR Qarjylyq monıtorıng agenttigi Qyzylorda oblysy boıynsha ekonomıkalyq tergep-tekserý departamenti óndirisindegi kezekti qylmystyq is boıynsha sot úkimi shyqty.
Mundaı keleńsizdikke «Qazaqstan temir joly Ulttyq kompanııasy» AQ-nyń Qazaly jol dıstantsııasynyń bólimshe bastyǵy jol bergen.
Ol temirjol qurylys materıaldaryn paıdakúnemdik maqsatta ıelikten shyǵaryp, talan-tarajǵa salǵan. Osylaısha olardy jymqyrǵan. Saldarynan Qyzylorda magıstraldyq jeli bólimshesine 23 mln. teńge ústinde zalal keltirilgen.
Bul azamattyń jaýapkershiligindegi taýarly-materıaldyq qundylyqtardyń jetispeýshiligi júrgizilgen aýdıtorlyq tekserý kezinde anyqtalǵan.
«Aral aýdandyq soty QR Qylmystyq kodeksi 195 baby, 4 bóligi 2 tarmaǵy boıynsha úkim kesti. Onda aldaý nemese senimdi teris paıdalaný jolymen asa iri mólsherde múliktik zalal keltirý jaǵdaıy kórsetilgen. Sottalýshyǵa, materıaldyq jaýapkershilikpen baılanysty qyzmetpen aınalysý quqyǵynan eki jylǵa aıyra otyryp, eki jyl bas bostandyǵynan shekteý jazasy jáne osy merzimge probatsııalyq baqylaý taǵaıyndaldy», - dep málim etti Qyzylorda oblysy boıynsha Ekonomıkalyq tergep-tekserý departamentinen.
Vedomstvo habarlaýynsha, oǵan qosa zardap shegýshi «Qazaqstan Temir joly Ulttyq kompanııasy» aktsıonerlik qoǵamynyń Qyzylorda magıstraldyq jeli fılıalynyń paıdasyna 23 mıllıon 152 myń teńgeni óz erkimen tóleý úshin sottalýshyǵa 2aı merzim belgilengen.
Eske salsaq, Qyzylordada asa iri kólemde bıýdjet qarjysyn jymqyrǵan sheneýnikterdiń ústinen is qozǵaldy.
