Qyzylordada kúnniń sýyǵynda balalaryn velosıpedpen tasyǵan azamatqa kólik mingizdi
Bul ıgilikti isti jergilikti bloger jáne jaıdarmanshy Asylhan Dúkenbaev júzege asyrdy.
Ol el turǵyndarynan jınalǵan aqshaǵa alynǵan jańa kóliktiń kiltin Qanat Otarovqa tabys etti.
Marapattaý rásimi 11 aqpan kúni qalalyq ortalyq meshittiń aldynda ótti.
«Qanat aǵamyz alǵashqyda mundaı syılyqtan bas tartty. Soǵan qaramastan biz oǵan jańa kólik kiltin berýdi uıǵardyq. Barsha janashyr jandarǵa alǵys aıtamyn. Negizi 3 kúnde 8 mıllıon teńgege jýyq qarjy jınaldy», - dedi Asylhan Dúkenbaev kópshilik aldynda.
Qanat Otarovtyń anasy barlyq qol ushyn berip, kómekteskenderge alǵys aıtty.
«Bizdiń otbasymyzǵa degen ystyq yqylastaryńyzǵa, kóńilderińizge rahmet. Qýanyshtan kóz jasymdy tyıa almadym. Barshańyzǵa shyn júrekten alǵys aıtamyn. Alty aı buryn kúıeýim kóz jumdy. Allanyń qudireti kúshti, bári qudaıdyń qolynda dep aıtatyn. Bul da Allanyń bergen syıy shyǵar» ,-dedi ol kisi.
Qanat Otarov ózine kólik syılaýǵa nıet bildirgen shymkenttik turǵynǵa rızashylyǵyn bildirdi.
Oǵan qosa Asylhan Dúkenbaevtyń janashyrlyǵymen jınalǵan qarjyǵa páter alýdan bas tartty.
«Shymkent qalasynyń turǵyny maǵan kólik syılaǵysy keletinin estidim. Nıetine rızamyn. Kóp rahmet, biraq, kólik ózinde qalsyn. Men aldym dep esepteımin», - dedi Q.Otarov.
