Qyzylordada kún jáne elektr stansalary salynady
QYZYLORDA. QazAqparat - Syr óńirinde kún jáne elektr stansalarynyń qurylysyn júrgizý josparlanýda, dep habarlaıdy QazAqparat tilshisi.
Qazirgi tańda osy maqsatta Qytaıdyń CNEEC memlekettik ınjenerlik kompanııasymen kelissóz júrgizilýde. Osy arqyly qalada «Smart city» jobasyn júzege asyrý kózdelip otyr.
Óńirlik kommýnıkatsııalar qyzmetiniń habarlaýynsha, bul kompanııa álemniń 70-ke jýyq elinde jylý, jel jáne sý elektr stansalaryn salǵan. Sondaı-aq, qoqys óńdeıtin zaýyttar salý isinde de jınaqtaǵan tájirıbesi bar.
Qyzylorda óńiri kún kózi jóninen belsendi aımaq ekeni belgili. Atap aıtqanda, jaz mezgilinde onyń belsendiligi aıqyn ańǵarylady. Ol qýattylyǵy joǵary kún elektr stansasyn salýǵa múmkindik beredi. Al «Aqlaq» qoımasynda 20-25 megavattyq sý elektr stansasyn salýǵa bolady.
Syr óńirinde qoqys óńdeıtin zaýyt salýǵa da mańyz berilip otyr. Ol aımaqta qaldyqtardy órteý jáne elektr energııasynyń belgili mólsherin shyǵarýdy kózdeıtin eki mindetke negizdelgen.
Syr óńirinde «Smart city» (Aqyldy qala) jobasyn júzege asyrý úshin Qytaıdyń álemge tanymal «Huawei» kompanııasymen ózara áriptestik týraly memorandým jasalǵan. Osy baǵyttaǵy alǵashqy jobalar Qyzylordada Syrdarııanyń sol jaǵalaýyndaǵy jańa bóliginde memlekettik-jekeshelik áriptestik negizde qolǵa alynady dep kútilýde.
Ádilet QAŃTARBAEV
