Qyzylordada «Kúmisketken» sý qoımasy salynady
QYZYLORDA. QazAqparat - Qyzylordada aldaǵy jyly Shıeli aýdany aýmaǵynda Kúmisketken sý qoımasy paıdalanýǵa berilmek. Bul týraly Qyzylorda oblysynyń ákimi Qyrymbek Kósherbaev aıtty, dep habarlaıdy QazAqparat tilshisi.
Óńir basshysy kóktemgi sý tasqyny kezeńiniń qorytyndysyna arnalǵan májiliste tıisti sala basshylaryna naqty tapsyrmalar júktedi.
«Ústimizdegi jylǵy sý tasqyny kezeńin shyǵynsyz ótkize bildik. Ony Syrdarııa ózeni boıyndaǵy sý sharýashylyǵy nysandarynda atqarylǵan qyrýar jumystyń oń nátıjesi dep bilemiz. Alaıda oǵan bosańsýǵa eshbir negiz joq. Tótenshe jaǵdaılardyń aldyn alý sharalaryn turaqty túrde júrgizýimiz shart», - dedi oblys ákimi májiliste.
Aımaq basshysy májiliste Kúmisketken sý qoımasynyń qurylysyn kópke sozbaýdy mindettedi. Sý qoımasy qurylysyn 2019 jyly paıdalanýǵa berý josparlanyp otyr.
Avtory: Ádiljan Úmbet
