Qyzylordada QR IV Jastar sport oıyndary bastaldy
QYZYLORDA. QazAqparat - Búgin, Qyzylorda qalasyndaǵy «Eýrazııa» sport kesheninde Qazaqstan Respýblıkasynyń IV Jastar sport oıyndarynyń saltanatty ashylý rásimi ótti,-dep habarlady QazAqparat HAA tilshisi oblystyq dene shynyqtyrý jáne sport basqarmasyna silteme jasap.
Tórt jylda bir márte uıymdastyrylatyn aıtýly dodaǵa Astana, Almaty qalalary men oblystardan sportshylar sporttyń 35 túrinen baq synaıdy.
Maqsaty - jastardyń sportqa degen qyzyǵýshylyǵyn arttyrý, buqaralyq sportty damytý, salaýatty ómir saltyn nasıhattaý jáne joǵary bilikti sportshylardy irikteý.
Baǵdarlama aıasynda Qyzylordada gandbol jáne toǵyzqumalaq jarystary ótýde. Toǵyzqumalaq 10 sáýirge, gandbol oıyndary 12 sáýirge deıin jalǵasady. Jastar oıyndaryna qatysýshylardy oblystyq máslıhat hatshysy Naýryzbaı Baıqadamov, QR Sport jáne dene shynyqtyrý isteri komıtetiniń tóraǵasy Elsııar Qanaǵatov quttyqtady.
Sport oıyndarynyń alaýyn jaǵý qurmetine aýyr atletıkadan jasóspirimder arasynda Álem chempıonatynyń qola júldegeri Evgenıı Lomanov, dzıýdodan jastar arasynda Olımpıada chempıony, álem chempıony Maǵjan Shamshadın, dzıýdodan jasóspirimder arasynda tuńǵysh Álem chempıony Baýyrjan Jaýyntaev ıe boldy.
Saıystardy ádil júrgizýge tóreshiler atynan toǵyzqumalaqtan joǵary ulttyq dárejedegi tóreshi, QR eńbek sińirgen jattyqtyrýshysy, jarystyń bas tóreshisi Aınur Jaqapbaeva, sportshylar atynan karate-dodan álem chempıony Móldir Jańbyrbaı ant berdi.
Jastar oıyndary respýblıkanyń barlyq aımaqtarynda shilde aıyna deıin jalǵasyp, birinshi shildede Aqtóbe qalasynda tennıs jarystarymen jabylý saltanaty ótedi.
