Qyzylordada QR aýyl jasóspirimderiniń jazǵy sport oıyndary ótedi
QYZYLORDA. QazAqparat - Qyzylordada Qazaqstan Respýblıkasy aýyl jasóspirimderiniń jazǵy sport oıyndary ótedi, dep habarlaıdy QazAqparat tilshisi.
Atalmysh shara 18 tamyz kúni Qazaqstan Respýblıkasynyń Sport kúni qarsańynda Qyzylorda qalasynda jalaýyn kóteredi. Aýyl jasóspirimderiniń respýblıkalyq jazǵy sport oıyndary tórt jylda bir ret ótkiziledi. Oǵan elisizdiń barlyq óńirinen komandalar qatysady. Oıyn baǵdarlamasynda ulttyq, buqaralyq jáne olımpıadalyq sport túri engizilgen. Dúbirli dodada respýblıkanyń 14 oblysynan 2000-ǵa jýyq 2001-2003 dúnıege kelgen aýyl sportshylary sheberlik baıqasady.
«Saıys sporttyń 10 túrinen: voleıbol, shaǵyn fýtbol, qazaq kúresi, toǵyzqumalaq, erkin kúres, asyq atý, grek-rım kúresi, dzıýdo, taekvondo, gandboldan ótedi. Maqsat - Elbasynyń «Bolashaqqa baǵdar: rýhanı jańǵyrý» atty maqalasyn iske asyrý, salaýatty ómir saltyn nasıhattaý, aýyldyq jerdegi jasóspirimderdi dene shynyqtyrý jáne sportpen júıeli shuǵyldanýǵa tartý, úzdik sportshylardy anyqtaý, sport rezervin daıarlaý», - dedi oblystyq dene shynyqtyrý jáne sport basqarmasynyń mamany Laýra Shońǵalova.
Ústimizdegi jyly ekinshi márte ótkiziletin aıtýly sport básekesi 21 tamyz kúni qorytyndylanady. Uıymdastyrýshylar: QR Mádenıet jáne sport mınıstrligi Sport jáne dene shynyqtyrý isteri komıteti, Qyzylorda oblysynyń ákimdigi.
