Qyzylordada kóshi-qon ortalyǵy ashyldy
QYZYLORDA. QazAqparat - Qyzylordada kóshi-qon ortalyǵy ashyldy, dep habarlaıdy QazAqparat tilshisi Qyzylorda oblysy ákimdiginiń baspasóz qyzmetine silteme jasap.
Atalmysh ortalyq shetelge issaparǵa shyǵatyn azamattar men óńirge kelgen sheteldikterge qyzmet kórsetetin bolady.
Ortalyqtyń ashylý saltanatyna Qyzylorda oblysynyń ákimi Qyrymbek Kósherbaev pen «Azamattarǵa arnalǵan úkimet» memlekettik korporatsııasy» kommertsııalyq emes aktsıonerlik qoǵamynyń Basqarma tóraǵasy Abylaıhan Ospanov qatysty.
Aımaq basshysy turǵyndardy kóshi-qon ortalyǵynyń ashylýymen quttyqtap, memlekettik qyzmet salasyn tsıfrlandyrý boıynsha oblysta júrgizilip jatqan jumystardy atap ótti.
«Elbasy óz Joldaýynda 2019 jyly memlekettik qyzmetterdiń 80 paıyzy elektrondy formatqa kóshýi tıistigin tapsyrdy. Búginde elimizde «Tsıfrlyq Qazaqstan» keshendi baǵdarlamasyn qarqyndy júzege asyrylyp keledi. 2018 jyldyń sońynda «Azamattarǵa arnalǵan úkimettiń» oblystyq fılıaly janynan Tsıfrlyq qyzmet kórsetý sektory el ıgiligine usynyldy. Endi Kóshi-qon ortalyǵyn ashyp otyrmyz. 2018 jyly óńirde 36 577 shetel azamaty tirkelip, 15 614 sheteldiktiń eńbegi zańdastyryldy. Demek, jańa ortalyqtyń qyzmetine degen suranys artady», - dedi oblys ákimi Qyrymbek Kósherbaev.
Jyldan-jylǵa bul baǵytta kórsetiletin qyzmet túrleri artyp keledi. Osydan 10 jyl buryn orta eseppen kúnine 50 shaqty adamǵa memlekettik qyzmettiń 70 túri kórsetilgen. Qazir memlekettik reestrdegi 750-den asa qyzmettiń 621-in «Azamattarǵa arnalǵan úkimet» kórsetedi. Qalǵanyn Elektrondy úkimet portaly arqyly alýǵa múmkindik bar. Qazir memlekettik korporatsııa oblys boıynsha bir kúnde 5-6 myń adamǵa deıin qyzmet kórsetedi.
