Qyzylordada qos qoly joq azamat tehnıka jóndeýdi kásip etken
QYZYLORDA. QazAqparat - Qyzylorda oblysy Qarmaqshy aýdanynda týa bitti qos qoly joq bolsa da, qol saǵat, teledıdar jóndeıtin jáne aıaǵymen jazý jazatyn qaısar azamat Nyshan Seksenov turady, dep habarlaıdy QazAqparat tilshisi.
Qazirgi tańda 50 jastyń bel ortasyna kelgen azamat taǵdyrdyń mańdaıǵa jazǵan qıyndyǵyna esh moıyǵan joq. Qashanda qaısar minezimen tanystaryn tańǵaldyryp keledi. Ol barlyq tirlikti aıaǵymen atqara beredi. Tipti, ekiniń biriniń qolynan kele bermeıtin saǵat jóndeý isin de anaý-mynaý sheberden kem atqara qoımaıdy. Ol jóndegen saǵattar sapasymen erekshe kózge túsedi. Oǵan qosa, teledıdar jóndeıtin sheberligi de bar. Oǵan da óz jerlesteri árdaıym rızashylyǵyn bildirip jatady. Osyndaı qabileti arqyly tabys taýyp júrgen jaıy bar. Óziniń jasaǵan jumystaryna aqyny qymbat suramaıdy. Al jóndelgen árbir dúnıeniń sapasyna eshkim syn taǵa almaıdy.
«Saǵat jóndeýge qumarlyǵym bala kezde oıandy. Shamamen 3-4 synyp oqıtyn kezim shyǵar. Alǵashqyda ermek úshin saǵat jóndeýge mán beretin edim. Ýaqyt óte kele onyń qyr-syryna tolyq qanyǵýǵa tyrystym», - deıdi ol.
Nyshan Seksenov - otbasyndaǵy ekinshi perzent. Ata-anasy balasynyń múmkindigi shekteýli ekenine qaramastan mektepke oqýǵa berdi. Bilimge qumarlyǵy arqasynda ol árip tanyp, saýatyn ashty. Jazýdy aıaǵymen jazýǵa ábden mashyqtandy. Osyndaı kúsh-jigeri men talpynysynyń arqasynda mektepti tolyqtaı támamdap shyqty.
Jigit aǵasy kólikti de tizgindeı alady. Óz taqymyndaǵy jeńil kólikpen el arasyndaǵy tirshilikterin atqara beredi. Anasy Janaı Ázirbekovanyń aıtýynsha, balasynyń este saqtaý qabileti erekshe. Kóp nárseni jadynda ustap, oıdan shyǵarmaı júredi.
Múmkindigi shekteýli jan ózine saǵat jóndeý kásibi ońaıǵa túspeıtinin aıtady. Keıde saǵattyń qaı jeri durys istemeı turǵanyn tabý úshin uzaq oılanyp, kóp shuqylaýǵa týra keledi.
«Saǵatty jóndeı almasam, ony ýaqytsha doǵara turamyn. Degenmen, ony qalaıda oryndaýǵa tyrysamyn. Jumysty aıaqtaımyn», - deıdi ol.
