Qyzylordada koronavırýstyń aldyn alý baǵytynda tıisti is-sharalar qolǵa alyndy
QYZYLORDA. QazAqparat - Qyzylorda oblysynda koronavırýstyń aldyn alý baǵytynda tıisti is-sharalar jasalýda, dep habarlaıdy QazAqparat tilshisi.
Syr óńirinde bul baǵytta qajetti is-shara jospary jasalǵan. Qytaıdan Qyzylorda qalasyna tikeleı qatynaıtyn áýe reısteri joq. Degenmen Qyzylorda oblysynda Qytaı azamattary eńbek etetin kompanııalar bar. Qyzylorda oblysynyń taýarlar men kórsetiletin qyzmetterdiń sapasy men qaýipsizdigin baqylaý departamenti mamandary atalǵan kompanııalar men kóshi-qon salasy boıynsha tıisti organdarǵa osy maqsatta arnaıy hat joldady. Onda saqtyq sharalaryn kúsheıtý máselesi jan-jaqty aıtylǵan.
Qyzylordadan Qazaqstan-Qytaı shekarasyndaǵy «Qorǵas» saýda ortalyǵyna qatynaıtyn jolaýshylar da az emes. Departament mamandary olardy tasymaldaıtyn avtobýs ıelerine de saqtyq sharalaryn saqtaýǵa nazar aýdarýdy suraıdy. Sondaı-aq, departament mamandary tarapynan ushaqtar ekıpajynyń quramy, jolaýshylar poıyzdarynyń jolserikteri, shekara jáne keden qyzmetkerleri de tys qalǵan joq. Olardyń barlyǵyna tıisti túsindirme jumystary jasaldy.
«Biz keıbir kompanııalardan Qytaıǵa issaparǵa shyǵý týraly josparyn shekteı turýdy suraımyz. Ol jaqtan kelgen azamattar bolsa bizge aqparat berýge ótinish bildiremiz. Olardy der kezinde esepke alyp, medıtsınalyq baqylaý júrgizýdi nazarda ustaımyz. Osy maqsatta tıisti oryndar men kompanııalarǵa qatynas hattar joldandy. Departament teplovızormen qashyqtyqta dene qyzýyn ólsheý múmkindigi bar arnaıy quralmen qamtamasyz etilgen. Bul baǵytta áýejaıda jumystar júrgizip jatyrmyz», - dedi Qyzylorda oblysynyń taýarlar men kórsetiletin qyzmetterdiń sapasy men qaýipsizdigin baqylaý departamentiniń bólim basshysy Álııa Ydyrysova.
