Qyzylordada koronavırýsty negizinen orta jastaǵy kisiler juqtyrǵan
QYZYLORDA. QazAqparat - Qyzylorda oblysynda koronavırýs ınfektsııasyn juqtyrǵan azamattardyń deni - orta jastaǵylar, dep habarlaıdy QazAqparat tilshisi.
Qazirge deıin óńirde qaterli indetti 3488 adam juqtyrǵan. Onyń 2,4 paıyzy syrttan tasymaldanǵany naqtylandy.
Al 57,7 paıyzy skrınıngtik tekserý nátıjesinde belgili bolǵan. Sondaı-aq, 39,9 paıyzy qarym-qatynas arqyly juqtyrǵan.
Qaterli indetti juqtyrǵandar arasynda bir aılyq náresteden bastap 99 jas aralyǵyndaǵy azamattar bar.
Onyń ishinde joǵarǵy kórsetkish 20-69 jas aralyǵyndaǵylar jáne 70-79 jas shamasyndaǵy azamattar arasynda jıi tirkelgen.
- Pandemııa bastalǵaly oblys boıynsha 2150 oshaq anyqtalyp, barlyǵyna qorytyndy zalalsyzdandyrý jumystary júrgizildi. Іndetke qarsy profılaktıkalyq sharalar uıymdastyryldy. Sondaı-aq, oblysta vırýstyq etıologııadaǵy pnevmonııa aýrýynyń 310 jaǵdaıy tirkeldi. Onyń ishinde, jeti jaǵdaı qańtar aıynda anyqtaldy. Buǵan qosa, búginge deıin 26 oqýshy COVID-19 aýrýyna shaldyqty. Búginde mektepter sanıtarlyq talaptardy qatań saqtaýda, - deıdi Qyzylorda oblysynyń bas memlekettik sanıtarııa dárigeri Dınara Jańabergenova.
Búginde oblysta 79 jedel járdem brıgadasy halyqqa qyzmet kórsetýde.
Munan ózge 40 sanıtarlyq avtokólik alynǵan.
«Aıta keterligi, jeke qorǵanysh zattarynyń 2 aılyq qory jasaqtaldy. Oblysta 210 ınfektsııalyq tósek oryn bar. Medıtsınalyq uıymdarǵa sanıtaızerler ornatyldy», - dedi oblystyq densaýlyq saqtaý basqarmasynyń basshysy Sabıt Pazılov.
Aıta keteıik, Qyzylorda oblysynda koronavırýsqa shaldyqqandar kún saıyn tirkelýde .
