Qyzylordada koronavırýstan taǵy 2 adam jazyldy

QYZYLORDA. QazAqparat - Qyzylorda oblysynda koronavırýs ınfektsııasynan 15 sáýirde taǵy 2 adam aıyǵyp shyqty, dep habarlaıdy QazAqparat tilshisi.

Bul jóninde Qyzylorda oblystyq densaýlyq saqtaý basqarmasy málim etti.

«Olardyń emi tolyq aıaqtaldy. Naýqastardan 2 ret test synamasy alyndy. Synama nátıjesi olardyń saý ekenin kórsetti. Naýqastar koronavırýs ınfektsııasynan tolyq aıyqty degen qorytyndy jasaldy. Olar oblystyq juqpaly aýrýlar aýrýhanasynan úılerine shyǵarylady. Іndetti jeńgen 2 naýqas ta Qyzylorda qalasynyń turǵyny. Emdelýshiler aldaǵy ýaqytta 14 kún boıy aımaqtyq dárigerler baqylaýynda bolady», - dep málim etti vedomstvodan.

Aıta keteıik, oblysymyzda buǵan deıin 2 naýqas atalǵan indetten aıyqqan bolatyn. Qazir barlyǵy 4 naýqas koronavırýs ınfektsııasynan jazylyp shyqqan.

Búgingi tańda Qyzylorda oblysynda koronavırýs ınfektsııasy qoıylǵan 127 adam bar.