Qyzylordada koronavırýspen kúreske 104 mln teńge bólindi
NUR-SULTAN. QazAqparat - Koronavırýs indetiniń aldyn alý jáne joıý sharalaryn júrgizý úshin Qyzylorda oblysynyń densaýlyq saqtaý basqarmasyna 104 mln teńge bólindi, dep habarlaıdy QazAqparat tilshisi.
Bul týraly Qyzylorda oblysynyń ákimi Gúlshara Ábdiqalyqova «Habar 24» telearnasynyń tikeleı efırinde málimdedi.
«Koronavırýs ınfektsııasynyń taralýyna baılanysty keseldiń aldyn alý jáne joıý sharalaryn júıeli júrgizý úshin oblystyq densaýlyq saqtaý basqarmasyna 104 mln teńge bólindi. Qarjynyń 12,8 mln teńgesine myń jarym lıtr antıseptık, 100 dana tósek jabdyǵy jáne betperde satyp alyndy», - dedi óńir basshysy.
Sonymen birge, tótenshe jaǵdaılarǵa arnalǵan rezervten 672 mln teńge qarajat qaralyp otyr.
Aıta keteıik, qazirgi ýaqytta oblys boıynsha ınfektsııa juqtyrǵandar sany 26-ǵa jetti. Onyń ishinde Qyzylorda qalasynda - 6, Jańaqorǵan aýdanynda - 16, Qarmaqshy aýdanynda - 2, Shıeli aýdanynda - 2 oqıǵa tirkelgen.
Karantınge jabylǵan Qyzylorda qalasy men Jańaqorǵan aýdanynda blokbeketter qoıyldy.
