Qyzylordada koronavırýsqa shaldyqqanyn dárigerlerden jasyrǵandar bar
QYZYLORDA. QazAqparat - Qyzylordada turǵyndar arasynda koronavırýs ınfektsııasy belgili bolyp, ol jaıynda dárigerlerge habarlamaǵan azamattar kezdesedi. Bul qaterli indetke shaldyqqan azamattar sanynyń artýyna sebep bolyp otyr, dep habarlaıdy QazAqparat tilshisi.
Oblystyq densaýlyq saqtaý basqarmasynyń basshysy Sábıt Pazılov óńirlik kommýnıkatsııalar qyzmetinde ótken brıfıngte atalǵan máseleni atap ótti.
«Sońǵy kúnderi óńirimizde sanıtarlyq epıdemıologııalyq ahýal turaqtalyp keledi. Degenmen bul saqtyq sharalaryna salǵyrt qaraýǵa sebep emes. Tirkelim kóbeıgen tusta ınfektsııalyq tósek oryndar sanyn kóbeıtip, der kezinde naýqastarǵa tıisti em júrgizip kelemiz. Osy rette óziniń koronavırýs ınfektsııasyna shaldyǵýy jóninde emhanasyna nemese dárigerge habarlamaı, úıden ózdiginen em qabyldap jatqandar bar. Olardyń qatarynan koronavırýs jaǵdaıy kóp anyqtalyp jatqanyn aıtqym keledi. Sol sebepti barsha turǵyndardan aýrý belgisi baıqalǵan sátten dárigerge qaralýyn suraımyz», - dedi basqarma basshysy.
Eske salsaq, 2020 jyldan bastap óńirde koronavırýske shaldyqqan 6 401 adam tirkelgen. Al bıyl jyl basynan beri 3009 adam qaterli indetti juqtyrdy.
Eske salsaq, Qyzylordada jyljymaly brıgadalar aýyldarda KVI-ge qarsy vaktsına salyp jatyr.
