Qyzylordada koronavırýsqa qatysty eki jalǵan aqparat taraǵan

QYZYLORDA. QazAqparat - Qyzylorda oblysynda COVID-19 ınfektsııasynan emdelip jatqan tulǵalar bar ekendigi týraly aqparat shyndyqqa janaspaıdy. Qyzylorda oblystyq prokýratýrasy osylaı málimdedi, dep habarlaıdy QazAqparat tilshisi.

Jalǵan aqparattar Whats-app messendjeri arqyly taralǵan. Onda Qyzylorda qalasy men Jańaqorǵan aýdanynda COVID-19 koronavırýs ınfektsııasynan emdelip jatqan naýqastar bar ekendigi aıtylǵan.

Polıtsııa osyǵan qatysty QR Qylmystyq kodeksiniń 274-baby 4-bóliginiń 2-tarmaǵymen (tótenshe jaǵdaı kezinde kórineý jalǵan aqparat taratý) sotqa deıingi tergep-tekserýdi bastady.

«Oblystyq densaýlyq saqtaý basqarmasynyń sońǵy málimetine sáıkes oblysymyzda COVID-19 koronavırýsymen naýqastaný jaǵdaıy tirkelmegen. Kúdik keltirilip, karantınge jatqyzylǵan adamdarda bul dıagnoz rastalmaǵan», - dep jazylǵan vedomstvo habarlamasynda.

Qadaǵalaý organy kórineý jalǵan aqparat taratýǵa QR Qylmystyq kodeksiniń 274-babyna sáıkes qylmystyq jaýapkershilik kózdelgen eske saldy.