Qyzylordada koronavırýsqa qarsy vaktsına talapqa saı saqtalýda
Óńirge 1 aqpannan bastap Reseıde óndirilgen «Spýtnık-V» vaktsınasynyń 1000 dozasy jetkizildi.
Alǵashqy kezeńde vaktsına 939 medıtsına qyzmetkerine, qalǵany jergilikti turǵyndarǵa egildi. Bul kezeń 1-17 aqpan aralyǵynda júrgizildi.
Al kelesi kezeńniń bastalýy úshin naýqas ekpe alǵannan keıin arada 21 kún ótýi qajet. Osyǵan oraı oblysta ekpe egýdiń ekinshi kezeńi 22 aqpannan bastaldy.
Oblysta jetkizilgen vaktsınalardy saqtaý máselesine basa nazar aýdarylyp otyr.
Oblys ortalyǵyndaǵy №6 qalalyq emhananyń aýmaǵynda ornalasqan qoımada koronavırýsqa qarsy jáne ózge de vaktsınalar saqtalady.
Oblystyq densaýlyq saqtaý basqarmasynyń basshysy Sábıt Pazılovtyń aıtýynsha, óńirge atalǵan qajettilikti «SK-Farmatsııa» mekemesi júzege asyrady.
Vaktsına aldymen áýe tasymalymen Shymkent qalasyndaǵy qoımaǵa jetkiziledi.
Odan bergi aralyqta arnaıy avtorefrıjerator arqyly Qyzylorda qalasyna keledi.
«Munda oblystyq ortalyqtandyrylǵan qoımada saqtalady. Qoımada arnaıy daıyndalǵan 12 muzdatqysh bar. Olar - medıtsınada paıdalanýǵa bolatyn, valıdatsııadan ótken qurylǵylar. Temperatýralyq rejım mindetti túrde baqylanyp turady. Vaktsınany qalalyq emhanalarǵa tasymaldaý úshin arnaıy termokonteınerler satyp alynǵan», - dedi basqarma basshysy.
Sondaı-aq, oblystyq ortalyqtandyrylǵan vaktsına qoımasynda 3 tońazytqysh kamera bar.
Kameralarda temperatýrany baqylaıtyn termometrler ornalasqan.
«Mamandar talapqa sáıkes temperatýrany eki mezgil baqylap otyrady. Tońazytqyshtardyń barlyǵy avtomattandarylǵan túrde generatorǵa qosylǵan. Jaryq sónip qalǵan jaǵdaıda da jumysyn jalǵastyra alady», - dedi oblystyq sanıtrııalyq-epıdemıologııalyq baqylaý departamenti basshysynyń orynbasary Álııa Ábdiqaıymova.
Aıta ketelik, Qyzylordada koronavırýsqa qarsy vaktsınanyń ekinshi dozasyn egý bastaldy.